Axeri-dantza, errituala, jokoa eta dantza
Andoaingo Axeri-dantzaren elkarteak goiza ongi antolatu zigun. Lehenengo hitzaldiak. Xabier Lasak axeri-dantzaren berreskuraketaren eta bilakaeran izandako zenbait kontu interesgarri aipatu zizkigun. Ondoren, Juantxo Arregik 1970eko hamarkadan axeri-dantza berreskuratzen aritutako taldeak izandako gora-beherak, zailtasunak eta lorpenak gogoratu zizkigun.
Axeri-dantzaren elkarteko lagunek jantziari buruzko azalpenak eskaini zizkiguten eta janztearen errituala, eta Andoaingo San Joan egunak berak berarekin dituenak xehetu zizkiguten.
Eta erritual horretan, jatekoa eta edatekoa inoiz ez dela falta frogatzeko, hamaiketako ederra egitera eraman gintuzten denok. Ondoren, saio praktikoa iritsi zen. Txistulariak prest ziren, eta baita axeri-dantza elkarteko lagun talde zabal bat ere. <7p> 
Txistularien ondoan, ikastaroa adi-adi jarraitzen Juantxo Arregi, Juan Antonio Amilibia Katto eta Iñaki Arregi. Axeri-dantzaren historian parte hartze handia izandako hiru lagun.
Zatika zatika, axeri-dantzaren zati guztiak osatzen joan ginen: aitarena, orratzarena, illentiarena,... eta bukatzeko perratza eta giza-dorrea.
Jokoa eta erritualak bat egiten dute dantzarekin, baina dena batera hartu, barneratu eta gozatu beharra dago, bestela herren geratzen baita axeri-dantza. Eta bere osotasunean festa indartsu eta berezia da, zalantzarik gabe.
