Dokumentuaren akzioak
Kontrapas
Elkarrizketa saioa da Kontrapas. Dantzarekin harreman zuzenago edo zeharkakoagoa duen lagun batekin solastuko da Aritz Ibañez dantzaria.
Bernat Etxepare, lehen euskal idazle ezagutuaren testurik ezagunena dugu Kontrapas. Bere bertsoei dantza airea darie izenburutik. Hartara, Kontrapas hori dantza bat dela gogoratuz, Etxepareren ondarea dantzariondako ere aldarrikatuz, izpiritu hori bera izanen duen (dibulgatiboa eta dantzaren funtzio eta balio sozialak aldarrikatuko dituena) dantzari buruzko podcast saioa da hau.
Dantzan elkarteak eta Euskokultur Fundazioak elkarlanean ezkoiztutako saioa da hau.
Kontrapas 006 Izaskun Beraza
2025 honetan urteurren bikoitza ospatzen ari da Andoaingo axeri-dantza. Berreskuratu zutela 50 urte dira aurten. Emakumeak ere parte hartzen hasi zirenetik, aldiz, 25 urte. Axerien buru da Izaskun Beraza Ormazabal (Andoain, 1984) eta berak azaldu dizkigu herriaren ondaretzat duen dantza honen zoko-mokoak.
Kontrapas 005 Patxi Larralde
Juan Inazio Iztuetak zioen dantza-maisu onak txistua jotzen ere jakin behar zuela eta bi dohain horiek betetzen ditu Patxi Larralde Elizaldek (Arizkun, 1966). Garai bateko dantza-maisuen soka luze horren azken-aurreko katebegia dugu, beraz.
Kontrapas 004 Mikel Sarriegi
Ondare ez materiala (dantza adibidez) ondare materiala zaintzeko erabiltzen dugun irizpide zientifiko berarekin zaindu eta berreraiki beharko genukeela esanez hasi du bere hitzaspertua Mikel Sarriegi Etxezarreta (Beasain, 1965) dantzariak.
Kontrapas 003 Maddi Ane Txoperena
Maddi Ane Txoperena Iribarren (Hendaia, 1994) Lesakan bizi den hendaiar erdi otsagabiarra dugu. Bertsolaria ez ezik, Lesakako ezpata-dantzaria ere bada azkenengo urteotan.
Kontrapas 002 Antton Luku
Irakasle, antzerkigile, idazle, dantzari eta orohar, xaxatzaile da Antton Luku Hargindegi (San Frantzisko, AEB, 1959). Nafarroa Behereko eta Lapurdiko inauteri adierazpena den Libertimenduaren berpizatile nagusia dugu bera.
Kontrapas 001 Ihitz Iriart
Kantari, pastoral errejent, dantzari eta hamaika kultur-proiekturen bultzatzaile da Ihitz Iriart Casenave (Aloze, 1987). Gure herri kulturaren ikuspegi zabal horretako talaiatik aritu zaigu.
Dokumentuaren akzioak
