Zuberotarrez dantzan ikasten Jon Iruretagoienarekin

Aurtengoan behintzat izan da aukerarik Zuberoako dantzetan murgiltzeko Dantza Ikasiren guardasolpean. Izan ere, urtarriletik apirilera lehendabiziko txandan eta maiatza eta ekaina bitartean bigarren txanda estuago batean, birritan eskaini behar izan dugu Jon Iruretagoienak emandako ikastaroa jasotako eskaerari erantzun ahal izateko. Urtarrilean ikastaroaren berri eman orduko, gure usterik onenak gainditu eta astebetean matrikulatzeko ateak itxi behar izan genituen. Kanpoan gelditutakoen interesari ere erantzun nahian, ordea, berehala Jonekin bigarren txanda bat lotu ahal izan genuen.

60 lagunetik gora izan dira, launa orduko lau saio trinkotan larunbat arratsaldez, Jonen irakasgaiak atentzioz jarraitzen eta ahaleginez ariketak errepikatzen. Lehendabizi Elgoibarko Inazio Bereziartua Musika Eskolan eta bigarrenez Errenterian Gipuzkoako Dantzagunean eman da ikastaro bera. Ikasleen jatorrien jakitun, kilometro dexente egin behar izan dituzte askok bertaratzeko baina merezi izango zuelakoan gaude.

Dantza zorrotzak dira Zuberoakoak oro har,  dantzakera behar bezala menderatu ahal izateko gorputzaren prestaketa fisikoa bezain teknikoa eskatzen dutenak. Lehendabizi beroketa saio zehatz batekin hasi izan da saio bakoitza, gorputzaren dantzarako prestaketa egoki eta beharrezkoaz hasi ere. Gero pixkanaka urrats edo mugimendu jakinen deskribapen eta ariketak zetozen. Bi txandetan dinamika bera erabili du Jonek Zuberoako dantzakera lantzeko; oinarrizko posizioetatik hasi, urratsen edo aitzineko püntien zehaztasunekin jarraitu eta pixkanaka aldairak osatuz joan da.    

Hasierako minutu eta hitzak izaten dira sarritan garrantzitsuenak, ikasgai guztian zehar zerbaitegatik errepikatuko direnak gero. Oraingoan ere hala gertatzen da. Zuberotarrek –euskaldun manexek legez– "lurraren kontra" dantzatzen dute. Alegia jauzi egitea, ez da goranzko

mugimendua! berriz, ahalik eta azkarren, lurra aurkitzeko beheranzko mugimendua baino. Eta zenbat plie egin ote dute ikasleek, eta zenbatetan tematu ote da Jon plie hori behar bezala egin zezaten?! Tentsioa non jarri behar den ere behin eta berriz nabarmendu du Jonek eta frexat eta antrexatek beste dimentsio bat hartu dute bat batean: lehen egiten genituenak eta ikastaroa bukatu ostekoak antzerakoak izango dira agian, baina ziur buruak darabilen ahalegina eta intentzioa ez direla lehengo bera izango.

Aurretik Zuberoako dantzetan eskarmentua zutenen abiapuntua –ustez– hobea zen arren, berriz atzera egin eta beren oinarria berrikusi eta sendotzen jardun dute. Esperientzia handirik gabekoek aldiz, hutsetik hasi eta oinarri sendo bat osatzeko aukera paregabea izan dute ikastaroan zehar. Lau saio hauen 16 orduek beste askotarako ezin zezaketen eman baina, aurrera bidean, Zuberoako dantzak behar bezala landu ahal izateko bidea markatzeko xedea beteko zutelakoan gaude. Oraindik bada zer ikasi eta zer landu! Bide horretan, beraz –manexok xiberotarrez dantzatzeko ahaleginetan– berriz ere elkar ikusiko dugulakoan gaude.

Hona hemen ikastaroek eman dutenaren zenbait argazki: Zuberoako dantzen ikastaroa-Jon Iruretagoiena