Gaztemundu 10: Sinboloetatik plazara

Teoria eta praktika uztartzeko eguna gertatu zen uztailaren 16an, Karmen eguna, Gaztemunduko partaideentzat; goizean euskal dantzetako sinbologia aztertu zuen hitzaldia entzun, eta ondoren, hitzaldian aipatutako dantzak zuzenean ikusteko aukera izan zuten, bai eguerdian Añorgako helduek eskeinitako soka-dantzan, bai eta arratsaldeko dantzariek egindako emanaldian ere. Hitzaldia Juan Antonio Urbeltzek eman zuen, dantzen interpretazio sinbolikoan bere proposamenak aurkeztuz. 

Sinbologia dantza tradizionalean

Juan Antonio Urbeltzek, soka-dantzaren, ezpata-dantzaren eta zinta-dantzaren sinboloak eta metaforak izan zituen aztergai bere hitzaldian. Soka-dantzak herri kohesioarekin, ezpata-dantzek plagen aurkako konjuroekin eta zinta-dantzak bizitzaren arbola moduan izan dezaketen sinbologiarekin lotu zituen.

Dantzen eremu sinbolikoaz hainbat gogoeta eta ekarpen eginda, ikasleek oraindik jakinmin eta galdera gehiago zitzuten, eta elkarrizketan aritu ziren ikertzaile eta dantzariak elkarrekin. Elkarrizketan Argia taldearen ibilbidez eta Juan Antonio Urbeltz beraren lanak ezagutzeko jakinimina erakutsi zuten Gaztemunduko kideek. 

Añorgako helduen soka-dantza

Karmen eguna festa egun handia da Añorgan, eta bertara abiatu ziren Gaztemundukoak helduen soka-dantza ikusteko asmotan. Egun gutxitan soka-dantza egiten ikasi, soka-dantzaren inguruko irakurketa sinbolikoen berri izan eta soka-dantza bat jai egun handi batean ikusteko aukera izan zuten. Añorgako frontoian, armailetan esertzen ziren heinean txistulariak jotzen hasi ziren eta beraien atzetik sartu ziren soka-dantzariak, Oier Mendiola aurresku eta Garikoitz Otamendi atzesku lanetan jardun zutelarik.

Añorgako ezpata-dantza eta brokel-dantza

Arratsaldean bueltatu ziren bidaiariak Añorgara Arkaitzekoek eskaintzen zuten agerraldia ikusteko. Lehenik Gipuzkoako ezpata-dantza dantzatu zuten, Garikoitz Otamendi kapitain lanetan eta Amaia Irurtia, Irati Ibargoien, Ainara Aizpurua eta Maialen Legarrea ezpata-txikiekin ari zirela.

Arkaitzeko dantzariek Gaztemundu programako partaideak ezpata-dantza amaieran egiten duten pasabidetik igarotzera gonbidatu zituzten, eta hauek dantzarien gonbita plazer osoz hartu zuten.

Ondoren Gipuzkoako zenbait dantza eta brokel-dantza ziklo osoa ikusteko aukera izan zuten. Karmen festetaz disfrutatzeko aukera izan zuten arratsaldea bertan pasatu baitzuten. Eguna amaitzeko Añorgako dantzariekin batera afaldu zuten añorgarren gonbidapenari esker.