Urratsez urrats dantzan ikasi

Udazkenerako dantza ikastaro eskaintza berri batekin dator Dantzan Ikasi. Zuberoako dantzen ezagutzan sakontzeko aukera izango dugu besteak beste Jean Mixel Bedaxagar bera irakasle hartuta, azken 40 urteotan dantza tradizionalaren alorrean erreferente nagusienetakoa den Argia taldearen oinarriak eta emariak ezagutzeko parada izango dugu eta dantzaren mugimenduaren analisian eta dantzaren pedagogian ekarpen garrantzitsuak egiten ari den Aiko taldearekin dantzaren irakaskuntza jarduteko oinarriak landuko ditugu.

Maiatza eta iraila bitartean burutu diren ikastaroek harrera polita izan dute eta Gipuzkoan dantza irakasleak eta dantzariak oro har, dantza ikasteko gogotsu daudela frogatu ahal izan dugu. Maiatzean Bizkaiko jota zaharren inguruko ikastarorako 60 lagunek eman zuten izena. Bi txandatan antolatu behar izan genuen, Dantzagunen (Arteleku) lehena eta Zarautzen bigarrena Zarauzko Udalaren laguntzarekin. Galdakaoko Andra Mari dantza taldeko Kepa Artetxe eta Mikel Goitia izan genituen dantza-maisu. Arratiako jota bezala ezagutzera eman den jota ereduaren jatorria, testuingurua eta dantzatzeko urrats eta arauak ikusi eta ikasten hasteko egokiera izan genuen.

Uztailean, Baztango mutil-dantzen ikastaroa egin genuen.  Arizkungo Patxi Larralde eta Arraiotz-eko Rafa Barragan izan genituen irakasle lehen jardunaldian, eta Patxi Laborda bigarrenean. Mutil-dantzak egiteko estiloa, karakterra, dantzaerarekin ardura handia erakutsi zuten irakasleek. Baztango dantza sorta honen urrats nagusien ezagutzara hurbiltzeko aukera izan genuen, eta horiek landu ahal izateko dokumentazio eta musika eskuratu ziguten irakasleek.

Irailean Goierriko dantzak izan ditugu ikasgai. Aurtzaka dantza taldeko Mikel Sarriegiren eskutik Goierriko dantzen aberastasuna ezagutzeko modua izan dugu eta aurkeztutako errepertorio zabaletik dantza batzuk praktikoki landu ditugu.

Ikastaroekin batera aurrera doaz Dantzan Ikasik martxan jarritako beste ekimenak. Gipuzkoako dantza irakasleen direktorioa osatuta dago eta horiekin egindako inkestaren emaitzak laster emango ditugu ezagutzera. Horrez gain, dantza tradizionalaren curriculum bat osatzeko adituen eta elkarte esanguratsuen proposamen eta irizpideak jaso dira  eta material horreki apailatuko den proposamena aztertu eta eztabaidatzeko zabalduko da datozen hilabeteetan.

• Dantzan Ikasi 2. boletina (pdf)