Mintegia: Zer dantzatzen da Elgoibarren? Elgoibarko dantza-sistemaren bilakaera Gipuzkoako dantza-eskolaren testuinguruan

2023/10/30
Mintegia: Zer dantzatzen da Elgoibarren? Elgoibarko dantza-sistemaren bilakaera Gipuzkoako dantza-eskolaren testuinguruan

Non dute jatorria gure dantzek? Beti dantzatu al gara berdin? Jakin al daiteke noiz gertatu diren aldaketak? Zergatik gertatu dira aldaketa horiek? galderei erantzuten saiatuko gara azaroaren 18ko Dantzan Ikasiko mintegian. Mikel Sarriegik bi hamarkadatik gora daramatza Goierriko eta Gipuzkoako dantza-sistema aztertzen. Ikerketa lan potolo hori urte amaieran argitaratzea aurreikusten da, baina gehiago itxaron gabe, lan horretara hurbiltzeko aukera paregabea izango dugu azaroan bertan. Elgoibarko Haritz dantza taldearen 50. urteurrena aitzakia bikaina izango da Sarriegiren lanaren aurrerapentxoa ikusteko. Horrela, mintegi honetan Elgoibarko dantza-sistemaren bilakaerari erreparatuko zaio Gipuzkoako dantza-eskolaren testuinguruan.

Lehendabizi, Gipuzkoa osoko dantza-maisuek gorde duten eta hain ezaguna ez den Iztuetaren oinordetza horren ezaugarri nagusienak aurkeztuko ditugu. Ondoren, joan den mendean Elgoibarren ezagutu zen dantza-sistema, ahal den neurrian, aurreko horren testuinguruan nola kokatzen den azalduko dugu. Eta jarraian, modu praktikoan erakutsiko ditugu azaldutako egikera horiek, elgoibartar dantzari ohien laguntzarekin.

Zer dantzatzen da Elgoibarren?
Joan den mendearen hasieran Joxe Lorentzo Pujana dantza-maisu ordiziarrak Elgoibarko dantzari txikiak trebatu zituenetik aurresku eta bestelako dantza asko eta asko dantzatu da herrian. Dantzari eta maisu segida luzea ezagutu da gerra aurretik eta ondoren, tradizio dantzatuaren katebegi: Romualdo Andonegi, Inazio Etxeberria “Parapan”, Iñaki Gorostiza, etabar garaian garaiko molde eta egikeraz dantzatu izan dira. Baina ugariak izan dira kanpoko eraginak, eta horiek ez ziren Ordiziatik bakarrik etorri: Zumarragatik 1960ko hamarkadan eta Donostiatik 1980ko hamarkadaren amaieran, esate baterako, aldaketak eragin zituzten bertako dantzarien dantzatzeko eran.
Elgoibarren ezagutu den dantzaeraren bilakaera Gipuzkoako beste herri askotan gertatu denaren adibide bat gehiago da. Orain arte, jarraitu beharreko itsasargi izan ditugu Juan Inazio Iztuetak orain 200 urte idatzi zuen liburuan jasotako arauak eta eginbideak, baina haiek ez dira, ordea, uste genuena bezain argiak. 25 urtez mamitutako ikerketa baten ondoren, Iztuetaren oinordetza izendatu dugun ezagutzak eskaintzen digu erdi-ezkutuan gorde den oinordetza horren oinarriak eta gakoak azaleratzeko aukera.

 

  • Mintegia: Zer dantzatzen da Elgoibarren? Elgoibarko dantza-sistemaren bilakaera Gipuzkoako dantza-eskolaren testuinguruan
  • Gidaria: Mikel Sarriegi
  • Data: 2023ko azaroak 18, larunbata
  • Ordutegia: 10:00-13:00
  • Lekua: Elgoibarko Kultur Etxea

 

Mikel Sarriegi (Beasain, 1965)

Mikel Sarriegi, 2019. Argazkia: Josu Garate - Dantzan CC-BY-SA
Beasaingo Aurtzaka dantza taldeko dantzari, zuzendari eta ikertzailea. Raimundo Gamayo, Martin Iraola eta Jesus Mari Garate dantza-maisuekin ikasia da. Dantzari gisa ibilbide zabala du: Argia, Jakintza eta Ostadar taldeekin aritua; Arrateko Amaren eta Andoaingo Santakruz Kofradietako Ohorezko kidea. Zazpi urtez Euskadiko Gipuzkoar Aurresku Txapelduna (1984-1991). Dantza-maisu bezala bultzatu ditu azken urte hauetan, besteak beste: Igartzako dantzarien Kofradia, Beasaingo Sanjoan esku-dantza edot Goierriko Agintarien soka-dantza. Duela 20 urtetik Gipuzkaoko dantza-sistemaren bilakaera ikertzen dihardu.