Bisita-dantzatua Patxi Labordarekin Soka erakusketan

Soka erakusketan barrena dantzaren mundura eta dantza eginez bisita-dantzatua eskainiko du Patxi Labordak azaroaren 21ean. Euskal dantzari begirada intimoa, soziala, historiko eta sortzailea eskaintzen dio Soka erakusketak eta bertan ageri diren dantza errepertorio, erritmo eta gorpuzkera desberdinetan barrena ibilbidea gidatuko du Aiko taldeko eta Bilbao Musikako dantza-maisuak.

Hitzez eta gorputzez, ahotsez eta dantzaz erakusketan dauden filme eta irudi ederrenatako batzuengan begirada jarri, eta horietatik zer nabarmentzen duen, zertan jartzen duen fokua kontatuko du Labordak. Ez da dantzaldi bat izango, baina ezta hitz bidezko hitzaldi soila ere. Gidariak hitzez emandako azalpenak bere oinak dantzan jarriz osatuko ditu, eta akaso entzuleek ere belarrietatik jasotakoa gorputzera jaisteko Labordaren keinuak imitatu beharko dituzte beren oinekin. Bisita-dantzatua beraz, dantzaren munduari bisita egiteko.

Bisita-dantzatua

• Data: 2019ko, azaroak 21, osteguna
• Ordua: 19:30
• Lekua: Dantzan Biharrian (Ubitxa 16, Eibar)
• Izen-ematea: Plaza mugatuak dira, izena emateko egin klik hemen.

Patxi Laborda (Iruñea, 1967)

Iruñean jaiotako, baina Sestaon bizi den dantzari, dantza maisu, koreografo eta txuntxuneroa. Ikuskizun ezberdinen gidoilari eta zuzendaria, dantzen berreskuratze edo birsortze prozesuetan aditua da. Bilbao Musikan egiten du lan, helduentzako tradiziozko dantzaren irakasle gisa. Aiko taldean erromeria dinamizatzaile moduan ere aritzen da. Dantza tradizionalaren inguruko hamaika ikastaro eman ditu bai gurean eta baita gure mugetatik kanpo ere, hango eta hemengo dantza-maisuekin etengabeko hartu emana mantenduz.