Emakume gladiatoreak, hondar gaineko borrokalariak

Historiari erreparatuz gero, ohikoa izan da emakumeak plazara irtetea dantzara. Hala ere, azken aldian borroka asko egin behar izan da zenbait lekutan emakumeak berriro jende aurrean agertzeko. Erroman, berriz, emakumeak plazara borrokatzera irteten ziren.

Emakume gladiatoreez ari gara. Plazara irten eta ezpata zein beste hainbat arma dantzan jartzen zituzten, baita publikoa bera ere. Gizonezkoen pare, aurrez aurre aritzen ziren; pareko bikotea izan beste borrokalaria edo izan basapiztia, hondar gainean bizia jokatzen zuten.

Emakume gladiatoreen arrastoak

Gizonezkoenaren gisan, emakumezko gladiatoreen jatorria hileta errituetan topatu da. Emakume gladiatoreen lehen aipamena iturri literarioetan topa dezakegu, Nicolas Damascok (K.o. 64. urtea) honakoa idatzi zuenean: "...batzuek beraien testamentuetan zehazten zuten erositako emakumerik ederrenak elkarren kontra borrokatu beharko zutela".

K.o. 11. urtean Erromako zuzenbideko lege batek familia senatorialetako 25 urtetik beherako gizonei eta 20 urtez azpiko emakumeei borrokatzea debekatzen die. Erromatarrentzat, ordea, ez zen eskandalua emakumeak borrokatzea; bai, ordea, emakume aske bat gladiatorea izatea. Esklabo edo gerrako presoek borrokatzeari ez zioten garrantzirik ematen, baina bai emakumea gizarte erromatarren parte bazen. 

I-II. mendeko harrian zizelkatutako emakumeen gladiatoreen irudia ere topatu zuten Halicarnason, egun British museoan dago.

Ludiak, mullierrak eta feminak

Ludusetan, gladiatoreak entrenatzen zuten lekuetan, bizi ziren emakumeei ludia deitzen zieten, gizonezko gladiatoreen emazteak edo bikoteak izan ohi ziren. Emakume borrokalariak, mulier edo femina izenez ezagutzen ziren. Mulierrak, klase baxuko emakumeak ziren, beraz, beraien borrokek moralki garrantzirik ez zuten. Feminak, berriz, klase altukoak ziren; beraien ekintzek gizarteari eragiten zieten. Emakume gladiatoreek, gizonezkoen gisan, beharragatik edota dibertsioagatik borrokatzen zuten. Edozein izanda ere borrokalarien arrazoia edo generoa, argi dago plazara irteten zirenean gizartea dantzan jartzen zutela.