Asier Uskola San Pedroren aurrean kaxarraren gainean dantzan, 2016-06-29. Argazkia: Dantzan.eus - CC-BY-SA
San Pedro egunez emakume bat igoko da aurten lehenengo aldiz Lekeition kaxarrankara dantzara. 2003. urtetik Asier Uskolak dantzatu du, 34 urtez dantzatu zuen Pedro Murelagarei erreleboa hartuta. Hanka apurtuta du, ordea, Uskolak; beraz, Ane Marurik ordezkatuko du. Etorkizuna dantza taldeko kideek azaldu digute aurtengo Bizkaiko Dantzari Egunean kaxa ateratzea erabaki zutela eta horretarako Maruri prestatu zela. Orain, Uskola lesionatu denez bera ikusi dute kaxara igotzeko dantzaririk egokiena. Dantza taldeak asmoa du, aurreskuarekin egiten duten moduan, hemendik aurrera kaxarrankako dantzaria urtero aldatzen joatea.
Oñatiko eta Tolosako kapitain emakumeak
Oñatiko korpus-dantzetan 2018an eta Tolosako bordon-dantzan 2013an hasi ziren emakumeak parte hartzen. Bi herrietako festetako dantzetan neska-mutilak elkarrekin dantzatu dira azken urteetan, baina aurten arte taldea gidatu duen buruzagiak edo kapitainak gizonezkoa izan dira. Korpus jaietako larunbatean, ordea, emakume batek hartu zuen kapitain rola Oñatin eta San Joan bezperan ere emakumea aritu da Tolosan bordon-dantzarien buruzagi lanetan. Hain zuzen ere, Ane Irazabal eta Miren Nazabal aritu dira dantzari taldeen buru.
Oñatiko korpus jaietako larunbatean Ane Irazabal kapitain lehengo aldiz, Oñati, 2022-06-18. Argazkia Maite Irizar
Tolosako San Joan eguneko bordon-dantzan Miren Nazabal kapitain, Tolosa, 2022-06-24. Argazkia: Ataria
Neska-mutilek osatutako sokak
Luzaroan gizonezkoek bakarrik atera dituzte soka nagusiak San Joan bezperan Irunen eta Abaltzisketan. Bi herrietan gizonezkoek gidatu dituzte sokak eta gero emakumeak gonbidatuak izan dira. Aurten, ordea, baia Irunen, bai Abaltzisketan neska-mutilak eskutik helduta elkarrekin atera dira hasieratik, generoari lotutako rol bereizketarik egin gabe.
Neska-mutilek osatutako San Joan bezperako soka-dantza, Irun, 2022-06-23. Argazkia: Kemen
Neska-mutilek atera dute San Joan bezperan Abaltzisketan soka-dantza, Abaltzisketa, 2022-06-23.
Urratsez urrats. Dantzaz dantza. Sasi guztien gainetik eta laino guztien azpitik. Kattaliñaño nauzu, Agerreko alaba. Ez nauzu gehiago Murde Beltzuntzen beldurrez.