Eltziegoko dantzak neska-mutilek dantzatzen zituztenekoak

2017/10/23 09:30

Eltziegoko dantzak neska-mutilek dantzatzen zituztenekoak

Eltziegoko dantzak, Eltziego, 1960ko hamarkada. Irudia: Asuncion Santos Pardo

Orain dela ia 60 urteko Eltziegoko dantzen irudiak bildu ahal izan ditugu Jesus Fernandez Ibañezen Elciegohistorico txokotik. Irudiotan, uztailaren 2an eta irailaren 8an Eltziegon dantzatzen dituzten bertako dantzen irudiak ageri zaizkigu. Nabarmentzekoa da, egun ez bezala, neska-mutilak elkarrekin dantzan ikus daitezkeela. Gaur egun "nesken dantzatzat" jotzen dira Eltziegokoak. Garai batean gizonezkoek, eta gero gizon-emakumeek batera dantzatu zituzten. Beraz, pentsa daiteke ez direla ez nesken ez mutilen dantzak. Dantzarien dantzak baizik.

Eltziego 1960 2 — Eltziegoko dantzak, Eltziego, 1960ko hamarkada. Irudia: Asuncion Santos Pardo

Elciegohistoricon irakur dezakegunez, kaxa jotzen ari dena Juan José Gomez da erredoblean nabarmentzen zaion estiloagatik eta posturarengatik. Urte hartan gaiteroak ez omen ziren izan, Pepe Gallegoren klarinetearen doinuan aritu ziren dantzariak.

Eltziego 1960 3 — Eltziegoko dantzak, Eltziego, 1960ko hamarkada. Irudia: Juan Claudio Cifuentesen familia

Ondoko irudi hauek ere 1960ko hamarkadakoak dira, Bañares familiakoak. Kasu honetan emakumeek bakarrik osatzen dute dantzarien zortzikotea baina bada erreparatzeko elementu bat, katximorro zuriz jantzita ageri da eta ez koloretako arroparekin eta zinta alaiez apaindurik.

Eltziego 1960 5 — Eltziegoko dantzak, Eltziego, 1960ko hamarkada. Irudia: Bañares familia.

Eltziego 1960 4 — Luis López, Mari Carmen Navarro, Chus Ramírez de Olano, Mari Carmen Ibáñez, Vitori Nieto, Mari Carmen Sáenz de Navarrete, Asun Ortega, Socorro Martínez, Mari Carmen Laorden y Delia Rubio, Eltziego, 1960ko hamarkada. Irudia: Bañares familia.

1820ko dantza-saioa

Eltziegoko udaletxeko kontu-liburuetatik, bertako dantzen inguruko informazioa ere atera du Jesu Fernandez Ibañezek. Santa Isabel jaiak eta Iraileko Ama Birjinaren omenezkoak ospatu zituzten. Bi jai egun handietan eta bezperatan Haroko Canuto Izquierdo dultzaineroa kontratatu zuten, 480 erreal kobratu zituen lau egunengatik. Dantzariak ere lau egunetan aritu ziren; Jose Ibañez eta beste zazpi dantzarik 60 erreal kobratu zituzten santaisabeletan eta Martín de Meiro eta zazpi dantzarik beste horrenbeste iraileko jaietan. Ibañez eta de Meiroren taldeak Eltziegoko dantzariek osatzen zituzten, bi dantzariek 26 eta 24 urte zituzten.

1820ko Eltziegoko festetan dultzaineroei egindako ordainketaren agiria. Irudia: Eltziegoko udaletxeko kontu-liburua.

Dokumentuaren akzioak

Bidali hitzordua

Dantzan

2017/10/24 10:17

San Lorentzoko dantzariek gogorazi digute, sarrera honetako argazki bat euren buletineko lehenengo zenbakian argitaratu zutela, baita neskek lehengo aldiz dantzatu zutenekoa ere. Argazki horiei esker ikus dezakegu gizonek zein emakumeek dantzatuak izan direla Eltziegoko dantzak. Gerra aurretik gizonek dantzatzen zituztela azaltzen dute baina galdu egin zen ohitura, gerra ondorenean Sección Femeninak berreskuratu zituen dantzak, orduan hasi ziren emakumeak Eltziegoko dantzak dantzatzen. Irudietan ikusi dugu 1960ko hamarkadan gizon-emakumeek elkarrekin ere dantzatu izan zituztela. Buletinean, dantzarien arropen xehetasunak ere ageri dira. Lotura honetan irakur ditzakezue azalpen guztiak:
http://danzantesdesanlorenzo.com/boletin1.html

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Sartu

Kattalin Agerre

Urratsez urrats. Dantzaz dantza. Sasi guztien gainetik eta laino guztien azpitik. Kattaliñaño nauzu, Agerreko alaba. Ez nauzu gehiago Murde Beltzuntzen beldurrez.

Emakumeak dantzan: gertatzen ari da

Legazpi: ezpata-dantza (1915-2015)

Deba: San Roke dantzan (1967, 2013)

Durango: dantzari-dantza (2015)

Lasarte (2011), Arizkun (2011)

Villabuena (2013), Pasaia (2015)

Ermua (2015), Barakaldo (2015)

Zumarraga: ezpata-dantza (2015)

Bera: makila-dantzak (2015)

Leitza: ezpata-dantza (2015)

Durango: San Fausto (2015)

Antzuola: trokeo-dantzak (2015)