Edukira salto egin | Salto egin nabigazioara

Tresna pertsonalak
Hemen zaude: Hasiera Komunitatea Dantzan

Orain arteko ekarpenak

Beasain: Loinatz 2021 haurren soka-dantza

2021/05/18

Soka-dantza dantzatu dute Beasaingo gaztetxoek Gernika pasealekuko frontoian. Asentsio egunaren hurrengo asteartean dantzatu ohi dute gaztetxoek aurreskua, baina pandemia tarteko, frontoia itxi eta Loinatz jaietan egiten diren dantzak frontoian dantzatu dituzte astelehenez. Aurrena ezpata-dantza eta segidan soka-dantza. Guztira 27 neska-mutil atera dira sokan. Desafioa, abarketak, agurra, fandangoa, arin-arina eta biribilketa dantzatu dituzte. Bukaeran, ordea, ez dute gonbidatu sokatik kanpoko inor dantzara. Irudiak: Amaiur Aristi. Loinatz, haurren soka-dantza, Beasain, 2021-05-17.

Beasain: Loinatz 2021 ezpata-dantza

2021/05/17

Loinazko San Martin ezpata-dantza egin dute Beasaingo neska-mutilek. Asentsio egunaren hurrengo astelehenean bi aldiz dantzatu ohi dute ezpata-dantza Beasainen dantzari gazteek. Ezpata-dantzariek prozesioan laguntzen dute, eta lehengo aldiz parrokian dantzatzen dira, gero, San Martingo baselizan. Aurreko urtean bai segizioa, bai dantza bertan behera gelditu ziren pandemia dela eta. Aurten ere ez da prozesiorik egin, baina ezpata-dantzariak atera dira Gernika pasealekuko frontoira. Espazio hori itxi eta sarrerak mugatu dituzte. Orain arte mutikoek bakarrik dantzatu izan ohi dute ezpata-dantza, baina aurtengoan neska-mutilek osatutako taldea irten da dantzara. Irudiak: Amaiur Aristi. Loinaz, San Martingo ezpata-dantza, Beasain, 2021-05-17.

 

Iurretako dantzariak 2021 dantzari-dantza

2021/05/14

Iurretako dantzariek dantzari-dantza osoa eskaini dute Oñatiko plazako frontoian. Iurretarrek Oñatiko Oñatz dantza taldearen 50. urteurreneko ekitaldian dantzatutako agintariena, zortzinangoa, ezpata joko txikia, banangoa, binangoa, ezpata joko nagusia, launangoa, makila jokoa eta txotxongiloa jaso ditugu bideoan. Hauexek dira Iurretako zortzikotea osatzen duten ezpata-dantzariak: Amaia Elizaran, Maitane Totorika, Elene Uribelarrea, Maria De Rueda, Jon Badiola, Nerea Intxausti, Mikel Jaio, Laia Gurrutxaga. Txistua eta danbolinarekin Mikelatz Goiria eta atabalarekin Jon Gaminde aritu dira. Iurretakoekin batera Iruñeko Duguna taldeko dantzariek eta musikariek ere parte hartu dute jaialdian. Irudiak: Oier Araolaza, Amaiur Aristi. Dantzari-dantza, Iurretako dantzariak, 2021-03-17.

Dantza taldeen emanaldiak baimendu ditu Jaurlaritzaren dekretu berriak

2021/05/13

Atzo zalantzak bagenituen ere, dekretu berriaren gaztelerazko testuaren arabera dantza talde amateurren emanaldiak baimenduta daudela ikusi dugu. Euskarazkoa bakarrik irakurrita s arrera argitaratu ondoren, Mikel Olanok ohartarazi gaitu dekretuaren gaztelaniazko bertsioak honakoa jartzen duela: "...

Gehiago irakurri

Mark Morris: Zinta-dantza

2021/05/10

Mark Morris koreografo amerikarrak muntatutako zinta-dantza ageri zaigu irudietan. Tradiziozko dantza ezagun baten interpretazioa garaikidea proposatzen du Morrisek, baina dantzaren jatorrizko arima galdu gabe. Dantzariek Henry Purcellen musikaren doinuan eta erritmoan dihardute dantzan. Zinta-dantza hau King Arthur operakoa da, eta opera hori 2006an egin zuen Morris-ek English National Operarentzat. Maiatza hasieran munduko txoko askotan ospatzen dira maiatzeko jaiak, eta hainbat lekutan zutitzen dira zuhaitzak. Gurean maiatzeko zuhaitza, arbola edo Donien Atxa modura ezagutzen dira, eta maiatzean, sanjoanetan edo udako jaietan altxa ohi dituzte herritarrek. Makila edo enbor horrek hainbat izendapen jasotzen ditu Europan zehar: maypole (ingelesez), el Mayo (gaztelaniaz), maibaum (alemanez), majtræ (danieraz) edota majstång (suedieraz). Horien inguruan zintak txirikordatuz dantzatzeko ohitura ere bada zenbait lekutan. Mark Morris, zinta-dantza, 2021-05-10.

 

Dantzerti ezagutzeko ate irekiak eta sarbide frogak

2021/05/07

Larunbat honetan Dantzerti hobeto ezagutzeko gerturatze jardunaldiak izango dituzte etorkizuneko ikasleek. Sarbide frogak ekainaren 14tik 25era bitarteko astean egitea aurreikusten da. Unibertsitateko gradu mailako titulazioa eskaintzen du Dantzertik bai dantzan, bai arte dramatikoan. Gradu ikas...

Gehiago irakurri

Aurreskua Akondian

2021/05/06

Kalamua mendigunearen inguruetako bat da Akondia, Eibarren. 749 metroko garaieran, 1390ean oñaztar eta ganboatarren arteko guda-zelaia eta 1937an Espainiako Gerra Zibilekoa izandako mendigain sinboliko honetan dantzatu du aurreskua Kezka dantza taldeak. Pandemia garaira egokituta kultura modu seguruan eta osasuntsuan bultzatzen jarraitzeko, Udaberriko Euskal Jaia antolatu du Eibarko Klub Deportiboak, Eibartik Arraterako mendi-ibilaldia prestatuz, ibilbidea musika eta dantza ekitaldiz jantziz, eta Arraten Euskal Barrokensembleren kontzertuarekin loratuz. Mendizaleak Akondiako gainetik pasatzea bertan dantzatzen ari zen aurreskua ikusteko aukera izan dute, hain zuzen bideo honetan airetik hartutako irudiek erakusten dutena. Irudiak: Jose Antonio Roige. Aurreskua Akondian, Kezka dantza taldea, Eibarko Klub Deportiboa, Eibar, 2021-04-18.

Judith Argomaniz: “Nik sentitzen dudana da hil naizela pieza hau egiteko”

2021/05/05

Ikuskizunaren izenburuak heriotza esan nahi badu ere, bizitzari buruzko pieza da Dead. Hala azaldu digu Judith Argomaniz Lasala konpainiako zuzendariak ikuskizun berri a Dferian aurkeztu ondoren . Lau emakumeren bizitzak oholtzan irudikatu eta bizitzari buruzko hainbat ...

Gehiago irakurri

Legazpi: Santikutz 2021 Ezpata-dantza

2021/05/04

Ezpata-dantza atera du Santikutz Egunean Legazpiko Sustraiak dantza taldeak. Urtebeteko etenaren ondoren, ezpata-dantzariak kalera atera dira Legazpin maiatzaren 3an. Udaletxe aurreko plaza egokitu egin dute publikoarentzat, hesiz inguratu, sarrera mugatu eta eserlekuak distantziak gordeta kokatu dituzte. Ezpata-dantzarekin batera soka-dantza, zinta-dantza eta Larrain-dantza egin dituzte Sustraiakeko dantzariek. Legazpiko Goiz Deia txistulari taldearen eta Iruñeko Ezpelur gaiteroen doinuan aritu dira dantzan legazpiarrak. Irudiak: Amaiur Aristi. Ezpata-dantza, Santikutz, Legazpi, 2021-05-03.

Andoain: Santa Krutz 2021 Ezpata-dantza

2021/05/03

Festa egun handia izan ohi da maiatzaren 3a, Santa Krutz Andoainen, eta ezpata-dantza izaten du protagonista. Aurten pandemiaren ondorioz, Urki dantza taldeak ezin izan du ezpata-dantza bere ohiko toki eta unean dantzatu, baina ezpata-dantzaren ohiturari eusteko bideoz zabaldu nahi izan dute aurtengo ezpata-dantza. 

Andoaingo Santakrutzeko Ezpata-dantzarien taldea honako hauek osatu dute honako honetan: Dantzariak: Asier Garmendia, Ainhoa Mujika, Andoni Alonso, Maider Callejon, Eñaut Egaña, June Miner, Mattin Yusta, Sonia Antolinez, Irati Beloki, Nahia Sarasola, Ane Fernandez, Leire Iturralde, Maialen Lopez de Munain, Beñat Gaston, Iraitz Guisado; Txistularia: Joxema Setien; Atabala: Juanto Olazaguirre; Irudiak eta edizioa: Mikel Arberas Audikana eta Alba Cabrera Jauregi.

Unanibiako zubian grabatutako ezpata-dantzaren irudiak ikus daitezke honako bideoan. Andoaingo Santakrutzeko Ezpata-dantzariak, Santa Krutz ezpata-dantza, Andoain, 2021-05-03.

Dantzan

Dantzan

dantzan 2001. urtean sortu zen eta 2003tik dantzan.com dantza sustatu eta hedatzeko elkarteak kudeatzen du.


Babestu dantzan.com