Edukira salto egin | Salto egin nabigazioara

Tresna pertsonalak
Hemen zaude: Hasiera Komunitatea Dantzan

Orain arteko ekarpenak

Altzürükü: maskaradak 2020 kerestuen ofizioa

2020/03/02

Kerestu nagusiaren papera betetzen du Aines Keheillek aurtengo maskaradetan. Berak azaldu digun moduan bera eta bere mutilaren lana zamaltzaina zikiratzea da. Laguntzaileak, ordea, ez du lanik egin nahi. Nahiago du dantzatu eta ardoa edan. Pitxuri dei egiten dio nagusiak laguntza eske, baina hark ere kale. Azkenean bi kerestuek zamaltzaina harrapatu eta zirikatu egiten dute. Aines Keheillerekin batera, Chloe Iratzabalek egiten ditu aurtengoan kerestu lanak. Biarnesez eta euskaraz hitz egiten dute eta bien arteko dantza-jolas bat egiten dute. Irudiak: Maite Irizar, Amaiur Aristi. Kerestuen ofizioa, Altzürükü, 2020-02-09, 2020-02-29.

Kresala dantza taldeak bederatzi eguneko itzulia egin du Ekuadorren

2020/03/02

Ekuadorren dantzan izan dira Donostiako Kresala dantza taldeko kideak. Faustino Aranzabal eta Idoia Ibarzabal dantza-maisuen gidaritzapean 20 dantzarik ikuskizunak, ikastaroak eta hitzaldiak eskaini dituzte Hegoamerikako herrialdean . Ambatoko Nazioarteko Folklore Jaialdian dantzatu dute eta ond...

Gehiago irakurri

Erratzu: Inauteriak 2020 damak eta mozorroak

2020/02/28

Damak eta mozorroak irten dira inauterietako asteartean Erratzun. Hiru egunez ospatzen dituzte inauteriak Erratzun, igandetik asteartera. Azken egunean irten dira damak kalera, beraiek zanbonbak izendatzen dituzten dunbel edo bonboak joaz. Zuriz jantzita, koloretako zintez apaindutako zapela buruan eta aurpegia beloarekin estalita eramaten dute. 

Patxi Irigoien dama eta dominagusiak eman dizkigu hainbat xehetasun. Hasieran dunbalekin jotzen duten erritmoari buruzko azalpenak ere eman dizkigu. Garai batean zanbonba esaten dieten dunbalekin ibiltzen ziren eskean baserriz baserri eta akordeoilariaren laguntzaz. Orain astearte arratsaldean irteten dira damak. Dozena bat irten ohi dira, baina azken urteetan kopurua handituz doa eta aurten inoiz ez bestek hartu dute parte. Garai batean baziren danbor egileak herrian, baina ofizioa galdu da eta orain beraiek egiten dituzte.

Irigoien dama bezala aritu da aurtengo inauterietan, baina horrez gain Danbolin nagusia edo Erratzun esaten duten bezala, dominagusia ere bada. Inauteriak antolatu, sosak bildu, kontuak eraman eta bestak eta iraileko errebestak antolatzea dagokio. Lau dominagusi izaten dira urtero eta bikoteka bi urte egiten dituzte.

Inauteriak, damak eta mozorroak, Erratzu, 2020-02-25.

Arizkun: Inauteriak 2020 sagar-dantza

2020/02/27

Inaute asteartera arte luzatu ohi dituzte inauteriak arizkundarrek. Azken egunean sagar-dantzariak irten dira kalez kale dantzan. Dantzarien azken dantzetan agertu dira zenbait mozorro eta azkenik hartza gainerako mozorroekin. Jon Zubiria, Ane Karrikaburu, Oier Neol eta Uxue Mugiro aritu dira dantzan; Patxi Larralde, Joseba Indabere, Eki Angebin, Xabi Durruti eta Ander Barrenetxea musikariekin. Sagar-dantza, Arizkun 2020-02-25.

Eibar: Koko-dantzak 2020

2020/02/26

Koko-dantzariak eta koko-marruak Eibarko Arrate eta Gorosta auzoetako baserrietan aritu dira koko-eskean eta dantzan otsailaren 15ean. Foxtrot eta arin-arina erritmora lotuan eta soltean aritzen dira dantzan kokomarruak eta makila-dantza egiten dute berriz koko-dantzariek. Toribio Etxebarria idazle eibartarrak XX. mendearen lehen partean zioenez makila-dantza egiten zuten Eibarko gazteek aratusteetan. Kokomokoek kuestazioan honako eske-kanta zaharraren bidez egiten dute eskea:

Koko-moko
saria bete moko
gibel-gibel
afarrittarako
dirua baneuka
patrikarako.

Irudiak: Idoia Lahidalga eta Mikel Lahidalga. Edizioa: Idoia Lahidalga. Eibar, Kezka dantza taldeak, koko-dantzak, 2020-02-20.

Markina-Xemein: Aratusteak 2020 Saragi-dantza eta hartza

2020/02/25

Lehen aldiz emakumeek parte hartu dute Markina-Xemeingo aratusteetan saragi-dantzan. Aratuste igandean ateratzen dituzte Zerutxu dantza taldeko kideek saragi-dantza eta hartza herriko kaleetara, eta kalez kale aritzen dira dantzan eta hartzaren dantza eta jokoa irudikatzen. Zerutxu dantza taldeko Iraide Antxiak eman dizkigu inauterietako tradizio honen inguruko xehetasunak. Irudiak: Oier Araolaza. Saragi-dantza eta hartza, aratusteak, Markina-Xemein, 2020. 

Hernaniar Bikaina izendatu dute Carlos Sanchiz dantza-maisua

2020/02/25

Hernaniko Xalaparta elkarteak 'Hernaniar Bikaina' izendatu du Carlos Sanchiz Sarriegi (Hernani, 1946). Hamaika omen dira Sanchiz omentzeko arrazoiak, baina batez ere dantzaren eta futbolaren bueltan herrian egindako lana nabarmendu nahi izan dute. Familiatik datorkio Sanchizi dantzarako zale...

Gehiago irakurri

Lantz: Inauteriak 1968-1969

2020/02/24

Pio eta Julio Caro Baroja anaiek Lantzen inauteriak berpizteko sugarra astindu eta lau-bost urtera agertu zen bertara Jaime Albillos kamera eskuan hartuta. Arotzak, txatxoak, zaldikoa, Ziripot, Mielotxin eta beste hainbat mozorro ageri zaizkigu Jaime Albillosek  Lantzeko inauterietan grabatu zituen irudi hauetan. Irudiak bi urtetan grabatuak dira, 1968an eta 1969an. Zehazki, otsailaren 26an eta 27an eta 1969ko otsailaren 25ean. Lantzen inauteriak berreskuratu eta oso urte gutxira hartutako irudiak dira, 1964an hasi baitziren berriro inauteriak ospatzen. Inauterietako astelehenean eta asteartean atera ohi da Lantzen inauteria kalera. 

00:00 Sei mozorro elkarri bizkarretik helduta kalean behera doaz.

00:21 Herritarrak ostatuaren kanpoan mozorroak noiz aterako zain daude eta bat-batean Mielotxin dantzatuz batera korrika irteten dira denak eta txistularien laguntzaz kalejiran hasten dira.

03:35 Ostatura itzultzen dira Mielotxin eta txatxoak.

04:21 Plazako irudiak. Txatxoek plazan zortzikoa, fandangoa eta arin-arina dantzatzen dituzte.

04:46 Zortzikoa eta fandangoa dantzatzen dute plazan.

06:18 Txatxoak ikus daitezke, baita herritarrak ere, horietako asko lehioetatik begira.

07:01 Arotzak.

8:08 Mielotxin eta txatxoak kalez-kale dantzan dabiltza kalejiran.

10: 54 Mielotxin ostatura sartzen dute.

11:01 zortzikoa dantzatzen dute arotzek eta txatxoek plazan.

Jaime Albillos, Donostiako Goizaldi taldeko dantzaria izan zen. 1960ko hamarkadan hainbat euskal tradizio eta festa filmatu zituen eta horietako batzuk ikus daitezke Dantzan-en:

 

Irudiak: Jaime Albillos. Lantz, inauteriak, 1968-02-26, 1968-02-27, 1968-02-25.

Lizartza: Inauteri-dantzak 2020

2020/02/21

Lau dantzari talde atera dira kalera aurtengoan Lizartzan inauteri-dantzak dantzatzera. Lizartzako Otsolar dantza-taldeko hiru talde eta Astigarragako Astigar dantza taldeko dantzariz osatutako talde bat. Otsailaren 16 goizean kalez kale ibili dira puska biltzen. Geldiune bakoitzean inauteri-dantzen zikloko dantza bat dantzatu dute eta eguerdirako plazan elkartu eta ziklo osoa plazaratu dute. Inauteri-dantzak, Lizartza, 2020-02-16. Argazkiak: Otsolar dantza taldea eta Jon Lopez.

Dantza filmeari buruzko erakusketa ikusgai da Zarautzen

2020/02/20

Jantziak, apaingarriak, argazkiak, marrazkiak,... Dantza filmaren irudikapen estetikoari buruzko erakusketa zabala ikusi daiteke egunotan Zarautzen. Besteak beste Koldobika Jauregi artistak Dantza filmerako diseinatu zituen jantziak ikusi daitezke Sanz Enea kultur etxean. Otsailaren 6an inaugura...

Gehiago irakurri

Orain arteko erantzunak

Dantzan on Biarritz 1948 Dantzak Eusko Ikaskuntzaren kongresuan

2020/04/01

Irudi hauek argitaratu genituenean Patxi Monterok ohartarazi gintuen bigarren aldiz atera genituela. Izan ere 2019ko martxoan atera genituen https://dantzan.eus/[…]/biarritz-1948-eusko-ikaskuntza-vii-kongresua. Ez ginen ohartu eta errepikatutako bideoan, Emilio Xabier Dueñasek abisatu digun moduan, irudien kalitatea hobea da, baina 3:22 minututik aurrerako irudiak horizontalki iraulita daude. Dantzariak alderantziz dabiltza, txistua eskumarekin jotzen ageri dira, normalki alderantziz jotzen dutenean , xirulari zuberotarrak ezkerrarekin, entseinariak ezkerrarekin darama bandera, puntu guztiak ezkerrarekin hasten dituzte, alborako mugimendu guztiak ezkerrera hasten dituzte...

Dantzan on Inauteriak 2020 oinarrizko egutegia

2020/01/23

Eskerrik asko! Ordutegiak edo informazio gehiago bidaltzerik bai dantzari@dantzan.com helbidera?

Dantzan on Ezpata-dantzarien alarde bat 1934an. Non da?

2020/01/10

Bai Xabier, mila esker! Beste zenbait irakurlek ere informazio interesgarria eskaini digu, hemen jasoko duguna:

- Pablo Izagirrek esan digunez "artikulu batean topatu dut, 1933ko ezpatadantzarien alarde oso handia egin zela Bilboko Ibayondo futbol-zelaian". https://dialnet.unirioja.es/servlet/articulo?codigo=157657

Informazio honekin osatu du Pablok kokapen aukera: "Nik arakatutakoaren arauera, Ibayondo (Ibaiondo) estadioa Getxoko udalerrian egotea da aukera fidagarriena, Areeta auzoan, Leioako udalerriko mugatik hurbil. Gaur egun desagertua dago futbol zelai hori. El Arenas futbol taldearen futbol zelaia izan zen urte horietan. Bitxia da, orduko artikulugileek Bilbon egin zela esatea, nahiz eta beste udalerria izan, kasu honetan Getxo. Oso ohikoa da arrain handiak arrain txikia jatea. Zein herri inportantea dago ondoan? Bilbo, ba Bilbon izan zela esatea. Atxikitutako argazkia, Areetako Ibaiondo estadiokoa da, eta antza handiak ditu filmazioko irudiekin: harmailak, zuhaitzak... Bestetik, sasoi horretan, 1930eko hamarkadan, Areeta ondo komunikaturik zegoen hainbeste lagun inguruko herrietatik hara hurbiltzeko ( Bilborekin, Erandiorekin, trenez; Ezkerraldearekin, itsasontziz, Portugaleteko Zubi Eskegiaz, itsasadarra zeharkatzeko... )

- Ignacio Elezcanok beste artikulu hau:
https://www.ehu.eus/[…]/18484

Eta Andoni Elezkanoren "Retratos de hierro y agua" lanean 70-71. orrialdeak begiratzea proposatu digu.

Dantzan on Dantza-kontuak Irulegi irratian

2019/11/07

Ez da ideia txarra. Ea gauzatzeko gai garen! Eskerrik asko Iker.

Dantzan on Zein da Madonnak Eurovisionen eskaini zuen euskal kanta?

2019/05/22

Halaxe da bai, Patxi eta Aitor, "Oihaneko Zuhainetan" da Madonnaren abesbatzeko monjeek hitzik gabe ematen duten kantaren doinua. Hemen hitzak, Jean Mixel Bedaxagarrek kantatu ohi dituen eran:

Oihaneko zuhainetan eder zuhainik gorena
Europako popülietan famatürik üskaldüna
Hura da zaharrena Kantabriaren semia
Lorius bere lurretan beti libre egon dena.

Leheneko üskaldüneri fama zaio baratü
Fidel zela herriari eta legetan argitü
Hura izan da gerlari, üsü odolak ixüri
Fidelitatian etxeki eta legia hareki.

Haritx piala bildürik üskal herri orotarik
Bakotxak bere botza emanik eta legia zen egin
Orai ezta legerik ez eta ere juntarik
Fidelitatia galdürik eta legia saldürik.

Dantzan on Barry Lyndon (1975): Goizeko ihintza dantzan

2019/04/24

Eskerrik asko zuzenketagatik Aitor! Bistan da oker jarri dugula.

Dantzan on Inauteriak 2019 oinarrizko egutegia

2019/01/22

Eskerrik asko ekarpenagatik!

Inork hitzordurik faltan botatzen badu, idatziguzue mesedez dantzari@dantzan.com helbidera informazioa eta argazkiren bat bidaliz eta gustora gehituko dugu inauteri egutegian.

Dantzan on Biarritz 1934 Euskal dantza jaialdia

2019/01/17

Durangaldeko dantzarien saioa xehe aztertuta honako argibide, zalantza eta xehetasunak aipatu dizkigu Durangaldeko dantzari batek:

"Durangaldekoak direnarekin guztiz seguru ere ez nago, baina pausukeragaitik oso gureak ikusten ditut. Bestalde Garaiko taldearen inguruan banderaren antzekotasuna (https://pbs.twimg.com/media/DjBgm-nXsAA0Rjo.jpg) eta 'eskas'etan hartzen duten kokapenak (https://www.youtube.com/watch?v=WCzNVC7mi78) kontuan hartuta kointzidentzia gehiegi iruditzen zait Garaikoak ez izatea.

Berriztarrekin, aldiz, zalantza asko ditut zeren haien bandera, antza gerra garaian desagertu zen, gainera 'Durangerriko banderak' liburuan aurkitu dudan argazkian beste kolore bat ikusten diot. Agian Izurtzako bandera izan daiteke? Izurtzakoena ere antza gerra garai inguruan desagertu zen. Honetan denean hobeto dakiena Jon Irazabal Agirre liburuaren autorea da egia esateko.

Pausoen xehetasunen inguruan lehenik, lehenago erakutsi zenuten bideo honekin konparatuz: https://dantzan.eus/[…]/berriz-dantzari-dantza-1923-1928. Alde ugari ikusten dizkiot. Hasteko Biarritzekoan askoz leku txikiagoan ikusten ditut (gaur egun egiten den bezala) eta bideo zaharragoan, bai eta hainbat argazki zaharretan askoz ere espazio zabalagoan daude kokaturik.

Hastean ezpatekin agurtzean Biarritzekoan bata bestea zapalduz dabiltzala esan daiteke. Orokorrean koordinazio gutxiagorekin edo egiten dute dantzan. Bandera eragitearena, aldiz, gaur egun guk jaso dugun bezala egiten dute: 3 buelta ezkerrera, 3 eskumara eta 3 ezkerrera musika doinua jarraituz. Aldiz, bandera eragitean ezpata bandereroaren makila dagoen lekuan uzten dute. Bestetik puntapioa jasotzean batzuetan ez dute guztiz jasotzen, Berrizko bideo zaharragoan aldiz bai. Eta 'buelta' ere batzuek gaur egundaino heldu zaigun 3 pausuetan egiten dute (berrizko bideo zaharragoan bezala) eta beste batzuek aldiz edonola.

Puntapio eta grabiletetan barietatea ikusten bada ere, nik dantza hauek errekuperatzen ibili zirenei beti entzun izan diet jende zaharrak beti puntapioa denbora bitan (lehenengo belauna altxatuta) eta grabiletea aurretik egiten zela ziotela.

Bestalde, 5:05 ean eta 5:41 eta 5:44 etan behean golpea jotzean saltorik ez egitea ere bitxia iruditu zait. Berrizkoek (https://www.youtube.com/watch?v=eSYw1--zlwM) ( 2:19 segundoan) antza bai egiten dutela horrela.

Azkenik, janzkera garai horretako argazkietan ageri dena da. Txalekoa, 'siemprebibie'... galduak. Ezpaten eta makilen luzera Durangaldean ohikoena izan den bezala ikusten ditut."

Dantzan on Oñati 2018 Eusko Ikaskuntzak 100 urte: aurreskua

2018/11/28

Eskerrik asko zure iruzkinagatik Patxi. Desafio gurutzatuari buruz Oñatikoek eman dezakete argibide gehiago, baina Oñatiko aurreskuan ohikoa den koreografia da hori, alegia, horrela egiten dela normalki, ez zen ezer berezirik egin agintariei begira. Kasualitatea izan zen agintariak parean egotea, ze teorian, hor ez, baizik eta sokan izan behar ziren.
Dantzan

Dantzan

dantzan 2001. urtean sortu zen eta 2003tik dantzan.com dantza sustatu eta hedatzeko elkarteak kudeatzen du.


Babestu dantzan.com