Oparo dator Bilboko Dantzaldia jaialdiko programazioa datorren asteetan

Filipe Moreira, Mizel Theret, Estéve / Paños eta konpainia, Jesus Rubio Gamo, Muriel Romero & Pablo Palacio eta Cielo Rasoren lanak izango dira datorren asteetan Bilbon. Oraintxe hilabete da Dantzaldia jaialdiaren XXIV. edizioa hasi zela. Glovo konpainiaren Alleo, Chey Jurado & Javito Mario-ren Samsara eta Ertzaren Otempodiz lanak aurkeztu dira gaur arte, baina oraindik asko du emateko aurtengo jaialdiak.

Asteburu honetan, Filipe Moreira portugaldar konpainiak Escuta (Entzutea) lana aurkeztuko du La Fundicion-en, urriaren 29an, 19:00etan. Isiltasunari eta gorputzaren eta ahotsaren aurkikuntzaren alderik primitiboenari buruzko lana da.

Azaroan etorriko dira emanaldi gehienak. Hilaren 2an, Mizel Thereten Oroitzen naiz dantza-lanari buruzko filma proiektatuko da. 2011ean estreinatu zen lan honek Jean Nesprias, Philippe Oihanburu eta Koldo Zabala euskal dantzarien memoria berreskuratzen du haien historia luze eta emankorra gogoratzeko. Azaroaren 11n, flamenkoa aireak izango dira Bilbon Estévez, Paños & Cíarekin. Triptiko#1 izeneko lana ekarriko dute Bilbora; Campanillero-Nondedeu-Silencios atalek osatzen dute eta paisaiari, gauari, soinuari, cante-ari, isiltasunari… buruzko piezak dira. Azaroaren 18an, berriz, Jesús Rubio Gamoren konpainia eta haren Acciones sencillas ikuskizuna. Bost dantzari, ahotsa, perkusioa eta txaloekin lagunduta. Eta azaroko emanaldiekin amaitzeko, Stocos Institutua eta Muriel Romero & Pablo Palaciok sortu duten Oecumene hiru dimentsiotako murgiltze-soinuzko pieza teknologikoa.

2023ko Dantzaldia abendura arte luzatuko da; 14an, Igor Calonge-ren Cielo Raso konpainiaren Hâmaïkà izeneko lanarekin amaituko da jaialdia; trukuaren, magiaren, ilusioaren eta irudimenaren inguruko festa dantzatu batean.

Dantzaldia 2023

Irailak 26

• Glovo: Alleo (Besterena), 19:00etan, Rekalde Aretoan. 

Urriak 3

• Chey Jurado & Javito Mario: Samsara, 18:30ean, Arte Ederren Bilboko Museoan.
  
• Ertza: Otempodiz, 18:30ean, Arte Ederren Bilboko Museoan.

Urriak 29

• Filipe Moreira: Escuta (Entzutea), 19:00etan. La Fundicion-en.

Azaroak 2

• Mizel Theret: Oroitzen naiz dantza lanari buruzko filma 19:00etan. La Fundicion-en.

Azaroak 11

• Estéve / Paños eta konpainia: Tríptico #1, 18:00etan, Guggenheim museoan.

Azaroak 18

• Jesus Rubio Gamo: Acciones sencillas, 20:00etan Barakaldo Antzokian

Azaroak 23

• Stocos Institutua/Muriel Romero & Pablo Palacio: Oecumene, 19:00etan, Azkuna Zentroan.

Abenduak 14

• Cielo Raso: Hâmaïkà, 19:00etan, Azkuna Zentroan.