Logela argazki-estudio bihurtu (edo alderantziz) eta hainbat bikote gonbidatu ditu Paul Schneggenburger argazkilariak gaua bertan pasatzera. Bikoteak lo zeudela, time-lapse sistemarekin argazkiak egiten joan da gau ilunean, bikoteen gaueko "dantza" erretratuz. Emaitza begibistakoa, lo gaudela ere dantza egiten dugula.

Egipto, Grezia eta Erromatar garaiko irudietatik hasita gaur egunekoetara, dantzaren historia eta mundu zabaleko hedapena ezagutzeko irudi bilduma zabala sareratu du Alkis Raftis-ek. Eskulturak, margoak, ontziteriako dekorazioak, mosaikoak, grabatuak, ilustrazioak eta irudi mota guztietan agertutako 5.000 dantza irudi baino gehiago ikus daitezke The Orchesis Portal izenekoan.

Asterix eta Obelix-en komiki berria euskarara itzuli dute, eta fransesez eta euskaraz aldi berean jarri da salgai dendetan. Horren berri ematen duen albistea ilustratzeko Obelix fandangoa dantzatzen erakusten d uen marrazkia egin du Duverdier-ek Sudouest egunkarirako.

Bilbori buruzko historia aztertzeko 17. Symposiuma antolatu du Eusko Ikaskuntzak, Bilboko Udalarekin eta Bidebarrieta Kulturgunearekin batera. Iñaki Irigoienek Bilboko jaiei buruz argitaratutako lanetik abiatuta Bilboko jai giroak, dantzak eta oroitzapen ekitaldiak aztertuko dituzte zenbait ikertzailek, datorren azaroaren 26an burutko den jardunaldian.

EAEko Kontserbatorioan egin ohi diren oinarrizko dantza ikasketetan zer ikasi behar den zehazten duen curriculuma argitaratu da Euskal Herriko Agintzaritzaren Aldizkarian. Dantza akademikoa da ikasketa hauetako ardatz nagusia, baina curriculum honetan aipagarria da dantza ikasketa hauek egiten dituzte ikasleek euskal dantza tradizionala lantzera behartzen dituztela, eta alor horretan zer landu behar duten zehazten dela.

Emakumeek dantzan izandako parte hartzea eta protagonismoa aldarrikatu eta indartzeko jaialdia antolatu dute Durangon Tronperri eta Txoritxu-Alai dantza taldeek. Emakumeak, bai dantzan eta bai gizartean oro har, baztertuak izan direla salatu, eta gaur egun festan parte hartzeko eskubideak errespetatzea eskatzen dute ekitaldi honen bidez.

Hezkuntza orokorreko irakasleei zuzenduta antolatu da "Euskal dantzen eguna" izeneko bigarren topaketa hau. Datorren azaroaren 6an, Biarritzen egingo da, eta bertan, eskoletako irakasleei euskal dantzak hurbiltzeko saioa egingo da. Euskal Kultur Erakundeak, Bordeleko Akademiako errektoretzak eta Pirino-Atlantikoko hezkuntza erakundeek antolatu dute jardunaldia Maurice Ravel Kontserbatorioa, Malandain Ballet Biarritz, Iparraldeko Dantzarien Biltzarra eta Biarritzeko mediatekaren laguntzarekin.

Bizkaiko Foru Aldundiaren ekimenez sortu da Bilbon DantzaBiz, Bizkaiko Dantza Etxea. Dantzaren alorreko eragile eta ekimen desberdinen koordinazio eta lankidetzan aritzeko sortu da, eta dantzaren alorrean informazioa, orientazioa, formazioa, sentsibilizazio, difusioa, dokumentazioa, babesa eta irisgarritasuna eskaintzea du helburu. Zenbait ikastaro antolatu ditu datozen asteetarako.

Zuberoako dantzen eta urratsen jatorriaz arituko da Jon Iruretagoiena Dantzan Ikasi formazio programan azaroaren 16an burutuko den saioan. Hitzaldi-dantzatua izango da, alegia, hitzez kontatu eta dantzaren bidez irudikatuko ditu Maritzuli konpainiako dantza irakasleak maskaradetako dantzen inguruko historia xehetasunak.

Dantzarako musika eginez lan ederrak egin dituen Xut taldeak, bere musika lan guztiak sarean jarri ditu, mundu osoan deskargatu eta entzuteko plataformetan. Roberto Antzano, Xut-en bultzatzaileak jakinarazi duenez, "kostata baina" Xut-en musika guztiak Spotyfin, iTunesen, Raphsodyn eta abarreko enpresetan zintzilikatuak daude dagoeneko.