Edukira salto egin | Salto egin nabigazioara

Tresna pertsonalak
Hemen zaude: Hasiera Albisteak Anne Marie Chiramberro: "Niretzat ere harrigarria da bere herriko dantzak ez dakizkiten euskaldunak ezagutzea"

Dokumentuaren akzioak

Anne Marie Chiramberro: "Niretzat ere harrigarria da bere herriko dantzak ez dakizkiten euskaldunak ezagutzea"

2014/05/07 08:50
Anne Marie Chiramberro: "Niretzat ere harrigarria da bere herriko dantzak ez dakizkiten euskaldunak ezagutzea"

Anne Marie Chiramberro. Argazkia: hellabasque.com

Anne Marie Chiramberro, San Franciscoko euskal diasporako kidea albiste da egunotan, Euskal Herrian izan baita bisitan, eta hainbat elkarrizketa egin dizkiote komunikabideetan. Diasporan beste asko bezala dantza taldean ibilitakoa da Hella Basque blogaren egilea, eta dantza kontuak agertu dira elkarrizketa horietako batzuetan. Gazteaukera blogean adibidez, Euskal-amerikarrek Euskal Herria nolakoa den ezagutzen ote duten edo iraganeko ikuspegi folkloriko bat gailentzen zaien galdetuta diote, eta hona bere erantzuna:

"Oso ohikoa da euskal-amerikar gazteen artean Euskal Herriaren ikuspuntu idiliko bat izatea, hots, mundu guztiak euskal dantzak dantzatzen dituena, musean jolastu, frontoira joan edo pilotaka jolasten duena, hori baita Estatu Batuetan jasotzen duguna euskal kulturaz. Niretzat ere harrigarria da bere herriko dantzak dantzatzen ez dakizkiten euskaldunak ezagutzea.  Askotan harritzen dira nik dantzatzen dakizkidalako." Euskal Herriaz zuen ikuspegi erromantikoa eguneratu duela azaltzen du Anne Marie Chiramberrok Gazteaukera blogean egin dioten elkarrizketan, eta aitortzen du Euskal Herrian bizi diren pertsonekin harremanak mantendu ezean, oso zaila da gazte euskal-amerikar batentzat egungo Euskal Herria nolakoa den jakitea.

Lehen ere agertu zaigu Anne Marie Chiramberro dantzan.com-en, izan ere Hella Basque blogean azken urtebetean idatzi dituen sarrerek oihartzun zabala izan dute euskal ziber-munduan, eta dantzari buruz esandakoak ere jaso izan ditugu, besteak beste zenbat maite duen dantza tradizionala: "Dantza tradizionala jarduera ezohikoa da, hazten ari den Ameriketako gazte batentzat jarduera interesgarria.

Diasporak euskal kulturarekin duen jarreraz kezka agertu duenik ere bada, Leire Barrenak Zuzeu albistegian "Diasporako gazteak: folklorea bai, euskara ez" idatzitako sarreran irakur daitekeenez. Diasporako gazteek euskal dantzan, pilotan eta musean" aritzen direla, baina ez dirudiela euskarak aurrera egingo duenik bertan adierazten du Kezkatuta Leire Barrenak: "Anne Marie Chiramberrok kontatzen dituenak orokortzearen arriskua nire gain hartuta, diasporako euskal komunitateek tradiziotik eta folkloretik edanez bizirauten baitute, batuko dituen hizkuntzaren beharrik gabe". Zuzeuko sarrerak izan dituen erantzunetan Itzaina izeneko batek aipatzen du arazo hori Euskal Herrian bertan ere gertatzen dela eta Altsasun ospatu berri den Dantzari Txiki eguna gogora ekarriz, bertan dantzari gaztetxo asko eta beren gurasoak erdaraz ari zirela dio. 

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.