Edukira salto egin | Salto egin nabigazioara

Tresna pertsonalak
Hemen zaude: Hasiera Bideoak Oñati 1967 aurreskua

Dokumentuaren akzioak

Oñati 1967 aurreskua

2019/10/09 11:30

1967. urteko Korpusetan Oñatiko plazan dantzatu zuten aurreskuaren irudiak ditugu bideo honetan; Jaime Albillos Goizaldi dantza taldeko sortzaileetakoak grabatuak. Aurresku lanetan sokaren lehen postuan Felix Errasti ari da dantzan, aurreskuari jarraituz Jose Antonio Sologaistoa, Migel Angel Iraola, Luis Moiua, Jabier Iraola, Angel Egaña, Jose Antonio Mugarza eta bukaeran atzesku lanetan Jose Luis Inza ari dira. Kapitaina, gona urdinarekin, Alejandro Irizar da. Dantza-maisu lanetan ari da aurreskuan, bertatik bertara zuzentzen dantzan, baina berak dantzatu gabe. Txistulariak, berriz, Higinio Iriarte, Agustin Zarketa, Eugenio Kortabarria eta Faustino Inza. 

Dantzari eta musikariak Jesus Irizar "Txutxin" eta Maite Irizarren laguntzaz identifikatu ahal izan dugu. Bideoan ikus dezakegu, neska atera bitartean zortzikoa dantzatzen zela lehen, baina gaur egun ez da egiten. Emakumeak sokara sartzen direnean zapi bidez elkartzen dira dantzariekin irudi hauetan, gaur egun zapirik gabe eskuak emanda lotzen dira. Egun kapitaina atera ohi da aurresku, baina 1967ko grabazio honetan Alejandro Irizar kapitaina sokatik kanpo dago. Orduan ere kapitainak gidatzen zuen aurreskua, baina ez zuen dantzatzen. Ohikoa zen garai hartan dantza maisuak dantza gidatzea albo batetik, sokan sartu gabe. Bukaeran, fandangoa, arin-arinean eta kalejira dantzatzen zituen, baina ez zitzaion neskarik ateratzen. Hermuan (Araba) dantzatzen den Bartearen aurreskuan oraindik indarrean dago dantza bertatik bertara zuzentzen duen dantza-maisuaren figura. Jose Lorenzo Pujana XX. mende hasierako dantza-maisu gipuzkoarra ere hainbat argazkitan agertzen da soka-dantzan funtzio hori jokatzen

Irudiak: Jaime Albillos. Aurreskua, Oñati, 1967.

Orain arte argitaratu ditugun Jaime Albillosen grabazioak:

Etiketak

Jarri bideo hau zure webgunean
Deskargatu

Dokumentuaren akzioak

2019/10/09 11:39
Ze polita! Eta Alejandro Irizar kapitaina dantza-maisu moduan soka-dantza zuzentzen ikustea ze ona!

Eta aizue, aurreskuak (hasieran ezkerrean dagoena) egiten dituen jirak ez dira oso bitxiak! Ez diozue jira galdu tankerarik hartzen? Oin bakarretik abiatzean da eta oin bakarrean bukatzen du, jira galduak Iztuetak definitzen dituen moduan, ez?
2019/10/09 11:41
Ederra!! Pena fandango eta arin-arinaren zatia falta dela (dantzatu bazuten...)
2019/10/09 18:55
Gordejuelari behin baino gehiagotan entzun izan nion, nola Candido Pujanak ere zuzentze lan horiek egiten zituen plaza irekian. Oker ez banago makil batekin ibiltzen omen zen eginkizun horietan eta ez zen izaten, antza, oso aldarte xamurrekoa

Erantzun

Erantzuna emateko identifikatu egin behar zara, gure webgunean erabiltzaile bat sortuz.