Soka erakusketa Iruñean, Sanfermin bezpera arte

Bihar ostirala, ekainak 2, zabalduko da Iruñeko Kondestablearen jauregian Soka, Euskal Kultur Erakundeak ekoizturiko euskal dantzari buruzko multimedia erakusketa. Sanfermin festen bezpera arte zabalik izanen da —ekainaren 30a arte— Iruñeko Udalak eta Duguna-Iruñeko dantzariok elkarlanean antolatu dugun erakusketa hau. Esposizioaz gain, hainbat ekitaldi osagarri —hitzaldi, tailer, proiekzio, dantza eta musika emanaldi— programatu dira hilabete osoan zehar, tartean gure taldearekin harreman zuzena duen beste erakusketatxo bat ere: 'Duguna 1951-1953, Iruñeko dantzarien genesia'. Izan ere, iaz Duguna ikuskizuneko dekoratuak topatu genituen erdi kasualitatez eta dekoratu horiekin eta bildu dugun material gehiagoxerekin —partitura, argazki, jantzi, eskuko programa...— gure taldeari izena ematen dion ikuskizunari buruzko erakusketa xumea atondu dugu. Hori ere bisitagai izanen da ekainaren 8tik uztailaren 28ra.

Soka erakusketaren inguruko programa osagarri osoa hau izanen da:

• Ekainak 2, ostirala, 19:00 - SOKA erakusketaren inaugurazioa Kondestablearen jauregian.
• Ekainak 7, asteazkena, 19:30 - Hitzaldia: Iruñeko Sanferminak: folklore-memoriaren eszenatokia eta lantegia. Mikel Aranburu eta Juan Antonio Urbeltz.
  
• Ekainak 9, ostirala, 18:30 - Erakusketaren bisita gidatua (gazteleraz) Karlos Irujoren eskutik*.
• Ekainak 14, asteazkena, 19:30 - Euskal dantza, iragana, oraina eta geroa:
  5 Aurresku film laburra (Josetxo Goia-Aribe). Mahai-ingurua: Josetxo Goia-Aribe, Karlos Irujo, Oier Araolaza eta Pantxika Telleria. Moderatzailea: Aritz Ibañez.
• Ekainak 15, osteguna, 19:00 - Dokumentala: Erraldoien dantza. Aurrestreinaldia eta solasaldia, Domingo Moreno zuzendariarekin.
• Ekainak 16, ostirala, 20:00 - Bandtzaldia: Aiko eta La Pamplonesa musika banda (Burguen plazan).
• Ekainak 17, larunbata, 11:30 - Erakusketaren bisita gidatua (euskaraz) Iñaki Arregiren eskutik*.
• Ekainak 18, igandea, 11:00etatik aitzina - Dantza emanaldia: Muthiko, Iruña Taldea, Ortzadar, Oberena, Kaskallueta eta Eluntze.
• Ekainak 21, asteazkena, 19:30 - Hitzaldi dantzatua: Korrotik pikutara: Euskal dantzaren historia dantzaz kontatua. Gari Otamendi eta Oier Araolaza*.
• Ekainak 23, ostirala, 18:30 - Erakusketaren bisita gidatua (euskaraz) Karlos Irujoren eskutik*.

                                         19:30 - Kontzertua: Euskofoniak, Musika-gogoeta eta dantza tradizionaleko ikuskizuna,

• Ekainak 24, larunbata, 11:30 - Erakusketaren bisita gidatua (gazteleraz) Karlos Irujoren eskutik*.

*Bisita gidatu eta hitzaldi dantzaturako sarrerak dohainik dira baina hala ere izena eman beharra dago 010 telefonoan, Kondestablearenean bertan edo 948 420 100-ean (Iruñetik kanpokoendako).