Hemen zaude: Hasiera Komunitatea Duguna - Iruñeko dantzariak Soka-dantza, euskararen eguna ospatzeko

Dokumentuaren akzioak

Soka-dantza, euskararen eguna ospatzeko

2015/10/27 10:40

Abenduaren 3an ospatu ohi da euskararen nazioarteko eguna eta egun horren bueltan euskaltzaleen Topaguneak 2 urte daramatza "Euskarak 365 egun" ekimena bultzatzen. Ospakizun horretan, dantza momentutxoren bat nahiko luketela esan zigutenean, guk San Fermin Aldapakoaren egunez ematen dugun soka-dantza egitea proposatu genien eta horrela egin izan dugu azken urte pare honetan, hori bai, hitzak egokiturik.

Ekimena pixka bat zabaltzeko eta Iruñea inguruko jendeak dantza eta letra ezagun ditzan, bideo hau zabaldu dute Karrikiri, Zaldiko Maldiko, Zorroka, Karrikaluze, Euskaldunon Biltoki eta Euskaltzaleen Topagunea antolatzaileek. 

Izan ere, heldu den azaroaren 28an, larunbatarekin, berriz aldarrikatuko dugu Iruñean eta dantzan, euskarak 365 egun dituela. Nahi duenak aurrez ikas dezake soka-dantzaren letra eta urratsa, eta han bilduko garen guztiokin dantzatu. Oker ez bagara, ekimena Euskal Herriko beste xoko batzuetara ere zabaltzeko proposamena luzatu dute.

Julio Sotok ekitaldi honetarako espres atonduriko hitzak hauek dira:

1) Mundu hau da guztiona
kolorea dariona (bis)
Hizkuntza mundu zati
berezia den bati
zentzu ematen diona (bis)

2) Nafarroan buruz-buru
Iruñea hiriburu (bis)
Pozez, alaitasunez
eta askatasunez
euskaraz bizi nahi dugu! (bis)

3) Aztu gabe atzo, gero
guk gaur nahi dugu hitz bero (bis)
Aupa! Mingainak blaitu!
Euskarak behar gaitu
egunero-egunero (bis)

4) Lantokian, mahai bueltan
asteroko erosketan (bis)
Indartzeko gehiago
handitasuna dago
une txiki horietan (bis)

5) Ale txiki bat eskatzen
handiagoa eskaintzen (bis)
Izateko desioz
jarraitu ilusioz
kaleak koloreztatzen (bis)

6) Bakoitzak bere esparruan
txingurriaren larruan (bis)
Amets egin, aritu
borrokatu, sentitu
bihotza mingain barruan (bis)

2015/10/30 19:46
Bai, hala da. Arrasaten ere soka-dantza + irradaka egin asmo dugu, ospakizunen amaieran, AED Euskara Elkarteak proposatuta (Topaguneatik jaso zuten proposamena). Geurean irradaka propioa moldatuko dugu, herrian oso errotuta dugun Txerri dantzaren doinua erabilita.

Erantzun

Erantzuna emateko identifikatu egin behar zara, gure webgunean erabiltzaile bat sortuz edo zure Twitter edo Facebook kontua erabiliz.

Duguna - Iruñeko dantzariak

Duguna - Iruñeko dantzariak

Iruñeko udalak 1949. urtean sortu zuen gure taldea, hiriko antzinako dantza usantzak gogoan, euskaldunon hiri buruzagiko zeremonialetan dantzan aritzeko. Sanson Galante eta Joanes Larraintzarkoaren oinordeko sentitzen dugu gure burua.

 

Duguna - Iruñeko dantzariak

Maiatzaren 2a karrika, 9 behea

31001 - Iruñea

Tfnoa: +34 657 33 29 44
duguna@duguna.eus