San Blaseko soka-dantzarekin esnatu da hartza, heldu da inauteria

Otsail hastapeneko egunak egun iragarleak dira: Kandelario, San Blas, Santa Ageda... Argia eta udaberria berehala etorriko ote diren edo ez ebazten da egun horietan. Aurtengoan berriz ere hartza atera dugu karrikara gure soka-dantzaren aitzinean iragarpena egin diezagun. Bere lozorrotik bixi ernatu da abiatu eta berehala, soka-dantzaren berri ematen ari zen kazetariengana oldartu baita. 

19:30etan ttanko entzun dira txistularien lehen doinuak eta San Nikolas plazatik Sarasate pasealekurantz abiatu da 28 dantzariz osatutako segizioa. Eztarriko minen kontra babesteko opil eta goxokiak saltzen ditzuten postutxoen ondotik egin dute dantzariek dantzarako plazaruntzko bidea. Sarasatera heldutakoan, ikusleek egina digute dantzarako tokia. Jon Benito aurreskuak gidaturik, eta hartzaren laguntzaz, oraindik pixka bat gehiago zabaldu behar izan dugu korroa. Behin soka plazari aurkezturik, belauntxingoa dantzatuz bertaratutako guztiei agur egin diete aurresku eta atzeskuak —Jon Benitok eta Saioa Seminariok—.

Axeri-dantzaren tenorea heldu da ondotik. Txistulariek 26 zortziko jo behar izan dituzte jarraian, eta merendua irabazi dute hartara. Dena den, gure buruei oroitarazi diegu Beasainen edo Aretxabaletan 40 eta 80 alpargata edo banango ere jo izan dituztela eta beraz, oraindik badugula hauspoa entrenatzerik! 

Banaka-banaka dantzari guztiak soka burutik pasa dira eta ondotik, gonbidatuak sokara sartzeko unea heldu da. Lehenbizi aurresku eta atzeskuak eta gero, dantzari guztiek elkarrekin, belauntxingoa dantzatu diete haien gonbidatuei.

Sokarako ongi etorria jaso ondotik, baina, dantzan ariarazi ditugu —hauek ere merendua irabazi beharko dute ba!—. Ingurutxoko inguru-txikia eta inguru-handia eman ditugu jarraian eta hartza eta bere zaintzailea ere animatu dira dantzara, ederki ernatuak diren seinale. 

Aurten San Blas opilak ahantzi ditugu —baten bat ez baitzen hartza bezain esna—, baina trukean merendu ederra eskaini diegu dantzari, musikari, gonbidatu eta bertaratu diren lagun guztiei. Ondokoan biak: opilak eta merendua, faltarik gabe!