Aurkeztu dugu Koloreaga berritua

Aspalditik ari ginen Koloreaga, Euskal Herriko festagileak koloreztatzeko liburuaren bertsio gaurkotua argitaratu behar genuela. Eta dantza taldearen urteurrenaren abaroa testuinguru egokia izan zitekeela iruditu zitzaigun. Beraz, Asisko Urmenetarekin harremanean jarri, Euskal Herri osoko dantza ohiturak aztertu eta hautatu, Asiskok marrazkiak egin eta gaur, azkenik, aurkeztu ahal izan dugu Koloreaga-ren 0.2 bertsioa.

Euskal Herri osoko dantzariak

Lehen Koloreaga hartan Nafarroa Garaiko dantzariak aintzat hartu bagenituen, honakoan, esparrua zabaltzea erabaki dugu eta Euskal Herriko zazpi probintzietako dantza ohiturak agertuko dira liburxka berrian. Honakoak:

• San Fermin Aldapakoaren ezpata-dantzariak, eta trokeo-dantzariak, (Iruñea). 
• Maskaradetako aitzindariak eta beltzeria (Zuberoa).
• Igartzako ezpata-dantzariak (Beasain).
• Animalien dantzariak eta Margarito hartza (Iruñea).
• Bordon-dantzariak (Bera).
• Axeri-dantzariak (Andoain). 
• Xemeingo ezpata-dantzariak, (Markina-Xemein). 
• Koko-dantzetako pertsonaiak (Eibar).
• Korpus dantzariak (Oñati). 
• Dantzariak eta Katximorroa, (Eltziego).
• San Martingo ezpata-dantzariak (Biarritz).
• Argia dantzari taldea (Donostia). 
• Iruinkokoko kokoxuri eta kokobeltzak (Iruñea). 
• Alde zaharreko paloteau-dantzariak (Tutera).
• Kaixarranka, (Lekeitio).
• Ezpata-dantzariak (Zumarraga). 
• Sorgin-dantzariak (Lasarte-Oria).
• Makila-dantzaria eta boboa (Otsagabia).
• Kaskaroten konpartsa (Uztaritze). 
• San Lorenzoko dantzariak (Iruñea).
• Errebonbiloak (Elorrio). 
• Ezpata-dantzariak (Iurreta). Irailaren 28 eta 29an
• Libertimenduko bolantak eta zirtzilak (Baigura) 
• Arrateko trokeo-dantzariak (Eibar). 
• San Ferminetako trokeo-dantzariak (Iruñea). 

Errealitate koloretsuago baterako Koloreaga berri bat

Koloreagaren legen bertsioa atera genuenetik 14 urte pasa dira eta denbora honetan euskal dantzaren alorrak, orohar gizarte osoak bezala, hainbat aldaketa bizi izan ditu. Horien artean guretako esanguratsua da, garai hartan gizonezkoek bakarrik ematen zituzten hainbat dantza molde, orain genero bereizketarik gabe dantzatzen direla. Errealitate hori agetu eta azpimarratu nahi izan dugu liburuxkan. Urrats hori eman duten dantza ohiturak hartu ditugu aintzat Koloreaga berri honetan.

Non erosi?

Iruñeko ohiko liburu dendetan (Karrikiri, Katakrak, Txalaparta...) izanen duzue erosgai Koloreaga berria, 12 euroko prezioan. Bestela, gure posta helbidera idatziz ere eskaera egin dezakezue eta behar duzuen tokira bidaliko dizuegu (garraio-kostuak gaineratuta). Eta Dantzan Dendan ere eros dezakezue, noski:

Erosi liburua