Hemen zaude: Hasiera Komunitatea Duguna - Iruñeko dantzariak Aurkeztu dugu Koloreaga

Dokumentuaren akzioak

Aurkeztu dugu Koloreaga

2010/12/23 16:55

Gaur eguerdiko 12:00etan "Koloreaga: Nafarroako festagileak" koloreztatzeko liburua aurkeztu dugu Abarzuza liburu dendan. Aurkezpenean Asisko Urmeneta marrazkilaria eta Aritz Ibañez Dugunako kidea izan dira. Beraiekin batera, Arizkungo hartza, Otsagabiko boboa eta Lantz-eko txatxoa.



Liburu honetan 32 marrazki agertzen dira, Nafarroako hainbat herrietako dantza, inauteri eta festetako pertsonaienak, besteak beste: Otsagabiko dantzariak, Lantzeko inauterietako pertsonaiak, San Lorenzoko dantzariak, Monteagudoko paloteadoko dantzariak, Elizondoko mutil-dantzariak...

1000 ale karrikaratu ditugu eta salgai izanen dira Dugunan bertan (duguna@duguna.org) edo Karrikiri eta Abarzuza liburu-dendetan.



Liburuarekin libreki libertitu.

Asisko Urmenetak prentsaurrekoan esan duenez, berarendako liburu, libre eta libertitu hitzak erro beretik datoz eta Koloreaga liburuan bat egiten dute hirurek. Batetik, liburu bat da, bestetik libre egiten gaitu, munduari gure txoko honetatik begiratzeko balio du, gure ohiturak ezagutzeko, glokalki eragiteko, mundura gure nortasunarekin ateratzeko. Azkenik libertitzeko balio du, marrazkiak koloreztatzeko, gure festetako (libertimenduetako) pertsonaiak ezagutzeko eta horiekin disfrutatzeko.

Liburua XXI. mendeko balorrei erreparatuz egin da, etorkizuneko dantzariei zuzenduz. Euskera hutsez kaleratua izan da eta berau sortzeko prozesu guztia (dokumentazioa, marrazketa, maketazioa...) euskeraz egin da eta hori ere azpimarratu du Asisko Urmenetak.

Bestalde, ez dira dantzari ezaugarri-"kaukasiar"ak bakarrik ageri. Etorkizuneko dantzariak beltzaranak, horixkak, nabarrak eta zuriak izanen dira kultura ezberdinen joan-etorriak tarteko, eta hala marraztu ditu Asisko Koloreagako dantzariak.

Koloreaga

Frantsesez "coloreage" deitzen zaie gisa honetako koloreztatzeko liburuei. Asiskok "Koloriaga" proposatu zuen liburuaren izena, Antton Olariaga marrazkilari handiari keinu txiki gisa. Euskaltzaindian galdetuta, Koloreaga egokiago zela ebatzi zuten (kolore hitza baitu erroa izenburuak) eta hartara, hitz berri eta guzti dator liburua. Hemendik aurrera koloreztatzeko liburuak euskeraz, Koloreaga!

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Duguna - Iruñeko dantzariak

Duguna - Iruñeko dantzariak

Iruñeko udalak 1949. urtean sortu zuen gure taldea, hiriko antzinako dantza usantzak gogoan, euskaldunon hiri buruzagiko zeremonialetan dantzan aritzeko. Sanson Galante eta Joanes Larraintzarkoaren oinordeko sentitzen dugu gure burua.

 

Duguna - Iruñeko dantzariak

Maiatzaren 2a karrika, 9 behea

31001 - Iruñea

Tfnoa: +34 657 33 29 44
duguna@duguna.eus