Hemen zaude: Hasiera Komunitatea Duguna - Iruñeko dantzariak San Fermin Aldapakoaren ezpata-dantza 2.0

Dokumentuaren akzioak

San Fermin Aldapakoaren ezpata-dantza 2.0

2010/10/19 10:45

Gezurra badirudi ere (guri oso azkar pasa zaigu denbora), urtebete pasa da iaz San Fermin Aldapakoaren ezpata-dantza estreinatu genuenetik. Gure asmoa da, iaz, aurten eta heldu diren urteetan ere dantza hau beti egun, toki eta ordu berean karrikaratzea. Eta hala egin genuen pasa den irailaren 26an ere.

Aurten ere eguraldia lagun, euririk ez zuen egin behintzat, goizeko 11:30etan irten ginen Arrotxapeako zubitik, Angel Leza banderazainak txistularien doinura bandera dantzatu ostean.



Santo Domingo kalean, tropelak bere zortzikoa dantzatu ostean, entzierroan San Fermini korrikalariek babes bila abesten dioten hornazinan dantzatu zuten, Julen Fagoaga, Eder Gartzia, Xabier Adrian eta Leire Leza kapitainek eta Aritz Ibañez buruzagiak.



San Fermin Aldapakoaren elizara helduta, meza bukatu zen arte itxaron genuen plazan eta indarrak hartu genituen Donezar-eko piper-opilak eta Irunberriko moskatela dastatuz. Kanpai hotsen artean, San Fermin karrikara atera zelarik Iosu Martin zerbitzariak piper-opila eskaini zion santuari eta ondoren kapitainek eta buruzagiak berriz dantzatu zuten haien bilantzikoa.



Prozesioa 12:15ak aldera atera zen: erraldoiak eta kilikiak, Pamplonesa musika banda, korporazio txikia, San Fermin-en irudia eta ezpata-dantzariak. Nabarreriako burgotik ibilaldia egin ostean berriz heldu ginen Aldapako San Fermin-en kaperara eta erraldoien dantzak lekuko, santuaren irudia elizan sartu zuten, heldu den urtera arte.

Udal plazara abiatu ginen orduan, bertan egiteko buruzagiaren inguruko arrosa. Tropela dantzan sartu zen plazan eta kapitainak zubien azpitik pasa ostean, arrosa ehundu zuten. Banderazainak berriz dantzatu zuen bandera leunki, buruzagia goratua izan zen ezpata luzeen gainean eta kapitainek haien azken bilantzikoa dantzatu zuten.



Udal plazako saioa bukatu eta gure egoitza ondoan amaitu genuen 2010. honetako jarduna buruzagiaren eta zerbitzariaren arteko bilantzikoarekin. Ondotik, mahaiaren bueltan bigarrengo ekitaldi hau ospatuz, itxitzat eman genituen aurtengo lanak.




Egunean zehar lagun batek esan zigun, Iruñean zerbait bitan errepikatzen denean ohitura bihurtzen dela. Guk egin dugu bigarrena, heldu den urtean hirugarrenaren bila!










Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Duguna - Iruñeko dantzariak

Duguna - Iruñeko dantzariak

Iruñeko udalak 1949. urtean sortu zuen gure taldea, hiriko antzinako dantza usantzak gogoan, euskaldunon hiri buruzagiko zeremonialetan dantzan aritzeko. Sanson Galante eta Joanes Larraintzarkoaren oinordeko sentitzen dugu gure burua.

 

Duguna - Iruñeko dantzariak

Maiatzaren 2a karrika, 9 behea

31001 - Iruñea

Tfnoa: +34 657 33 29 44
duguna@duguna.eus