Iruñea eta Nablus-eko sokak korapilatu ziren eguna

Jaun Done Saturdi egun berezia izan da aurtengoa. Arrazoi ezberdinengatik. Horietako lehenengoa ez dugu salatuko baina begi zorrotzagoa dutenak konturatuko dira, agian. Bigarrena da, eguna Nablus-eko —Zisjordania (Palestina)— Hattah dantza taldearekin partekatzeko aukera izan dugula. 

Goiza eguzkitsu baina fresko iratzarri da. Itxura ona zuen goizak, harik eta iruñeko garbiketa zerbitzuei bururatu zaien arte karrikak prozesioa abiatu baino minutu gutxi batzuk lehenago ureztatzea. Berriz ere espartin sorta ederra —38 pare— perko errekara! Prozesioak aurrera egiten zuen heinean gure alpartgatetako espartzua hanpatzen eta hanpatzen joan da. Oinak mela-mela eginda eta azaroaren 29ko goizaren freskura... marranta ederra bilduko genuen, hamaiketakoaren ordua heldu ez balitz.

32 lagunekin, 4 otxoterekin beraz, eman ditugu trokeo-dantzak. Bi makila-txikien dantzak ezpata-brokelena eta arku-dantza. Arratsaldean Udal plazan egitekoa den argi ikuskizunerako tramankuluek tokiaren antolamendua baldintzatu digute guztiz. Bi soinu dorre erraldoi, ohikoa baino azkoz aurrerago dantzatu beharra, toki gutxiagorekin... eskerrak behintzat ez diguten Udaletxeko irteera eszenatokiarekin itxi! Tira... Trokeo-dantzak eman eta ohiko bazkariarekin ospatu dugu gure dantza taldearen 76. urteurrena. 

Bazkarian tentuz ibili behar izan gara. Arratsaldean oraindik badugu zer egina. Hattah-ko dantzariekin halako dantza trukaketa bat izan dugu 19:00etan Autobus geltoki zaharrean. Haiek Dabke dantzak eman dituzte —gure soka-dantzen parekoak— eta haietako batean guk ere parte hartu dugu. Gero, kontrakoa egin dugu. Soka-dantza plazaratu eta une jakin batean palestinarrak sokara gonbidatu ditugu eta ingurutxo parteetako bat ere elkarrekin dantzatu dugu. Ondotik, oroigarri trukaketa eta dantza inprobisatuagoak. Ederra bezain hunkigarria izan da unea. 

 Egun hau behar bezala pasa dadin lagundu baikaituzte, esker bereziak eman nahi dizkiegu Maritzuli konpainiari eta Yalah Nafarroari. Eta gainontzekoei, urte berri on!