Dugunako dantzarion eguna ospatu dugu, aspaldiko partez!

Pandemiak 2 urtez ebatsitakoak berreskuratuz goaz poliki-poliki. Esate baterako, joandako ekainaren 18an 2019az geroztik egiterik izan ez dugun Dugunako dantzarion eguna atera dugu plazara. Txikien taldeko dantzari-kumeak eta helduen taldeko dantzariak aritu gara batzuk besteen ondotik eta ondoan. Gure trokeo-dantzak hartu ditugu emanaldia atontzeko aitzaki. Trokeo-dantzetako erraminta-dantza bakoitzeko, dantzari txikiek gisa bereko beste dantza bat eman dute.

Hasteko hala ere, dantza umezurtz batzuk eman ditugu, txikien partetik arraposturik gabeak: Karrika-ingurua, brokel-dantza eta makil handiena. Brokel-dantzan Maider Zubizarreta durangarra aritu zaigu infiltratu gisa. Ikasturte osoan gurekin entsaiatzen aritu da eta plazara ateratzeko maneran ikasi ditu gure dantzak. Inork ez dio antzeman iruindarra ez zenik!

Makil-txikien dantzekin eman diogu hasiera gure eguneko jolasari. Taldeko nagusiek, Xenpelarrena dantzatu dute, habanera airean. Txikien taldeko nagusienek erantzun diete, gure beste makil-txikiena emanez, Betroiarena. Ondotik, txikien-txikienek Berako makil-dantzak dantzatu dituzte, ezin mununuago!

Arku-dantzen txanda heldu da ondotik. Helduen beste taldetxo batek Pinpirin eta florian doinua duen uztai-dantza eman du eta segidan, txikien hirugarren taldeko dantzariek Biarritzeko San Martineko arku-dantza eman dute:

Zintak txirikordatzeari eta destxirikordatzeari ekin behar genion ondotik, zinta-dantzekin. Oraingoan, gazte belaunaldiak erakutsi du helduak baino iratzarriagoak daudela. Izan ere, hanka-sartze kateatze baten ondotik, trokeo-dantzari nagusiek zintak txirikordatu eta berriz txirikordatu dituzte, txikien harridurarako: "Baina zergatik ez dituzue zintak destxirikordatu?". Haiek aldiz, txintxo demonio egin dute Gipuzkoako zinta-dantza, baita makil-handiena ere (hasierako dantza blokearekin lotuta dagoena, orain konturatu garenez!).

Talde guztia sokan lotu eta biribilketa alaiean eman diogu bukaera ordu beteko dantza saioari. Ondotik, bazkari eder baten inguruan ospatu dugu itzulera!