Denak soka bereko

Udako oporren ondotik tupustean heltzen ohi zaigu Batasunaren Pribilegioaren emanaldia. Alta, egun gutxi batzuetako prestarekin aski izan dugu sasoi punttua berreskuratzeko. Iruñeko udala bere arrandia handienarekin ateratzen da karrikara irailaren 8an eta arratsalde epel eta eguzkitsuak oraindik ere dirdira bereziagoa eman dio pasealdiari. Dantzara atera aitzin, Iruñea zaharreko hiru burguetako karrikak kurritu ditugu udalbatzari lagunduz. Oier Santamariak egin ditu dantzarion taldeko buruzagi lanak eta Maria Izalek banderariarenak.

Herriko Etxera heldu, arropak ziztu bizian aldatu, eta soka-dantzarako prest gara. Carlos III. Nafarroako erregeak 1423an agindu zuen Iruñeko aitzineko hiru burguak bakar batean bat zitezela. Agiri horren kopietako baten bazterrean aspertutako eskribauren batek zirriborratutako zaldikoaren marrazkian oinarritutako bi gaitari zaldunak atera dira plazara eta putz egiten hasi. Eta haiekin bat dantzariak, eskuetatik helduta, lerro-lerro, hasi dira plazan gora eta behera kiribilka. Jon Benitok gidatu du soka eta Maialen Etaiok eman dio arrapostua, sokaren gibeletik.

Egun honekin Iruñeko hautetsi guztiei luzatzen diegu dantzarako gonbita eta aurten honakoak animatu dira dantzara: Garbiñe Bueno (EH Bildu), Fernando Sesma (Na+), Maider Beloki (EH Bildu), Maria Chavarri (Na+) eta Marian Aldaia (EH Bildu), beste hainbat herritarrekin batera. Guretako ederra izaten dira egun horretako fandango eta arin-arinak eta kanpotik ikusi duenetakoren batek esan digu berari ere irudi berezi eta indar handikoa gertatzen zaiola une horretakoa. Besteen abileziak ezagunak genituen baina Fernando Sesmaren arteak arreta deitu digula azpimarratu nahiko genuke hemen. Guztiak ere bikain aritu dira, baina!

Kalejira Alaiean borobildu ditugu aurtengo Batasunaren Pribilegioari zegozkionak, denak soka bereko.