Pasa den urriaren 3an, Berria egunkariaren Igandea gehigarrian euskal dantza tradizionalaren inguruko erreportaje eta elkarrizketa sorta argitaratu zen. Juan Antonio Urbeltz, Claude Iruretagoiena, Jon Maya, Sabin Egiguren, Edu Muruamendiaraz eta Oier Araolazaren hitzak jaso zituzten.

Urriaren 30etik azaroaren 15era Estatu Batuetako mendebaldean jota eta porru ikastaro trinkoak eskainiko dituzte Galdakaoko Andra Mari dantzari taldeko bi irakaslek. Mikel Goitia eta Iraitz Barandiaran-ek Salt Lake City, Chino eta Boisen eskainiko dizkiete ikastaroak bertako euskal dantzariei.

Datorren azaroaren 13an eta 14an, Greziako Epiro eskualdeko dantzen ikastaroa burutuko da Altsasuan. Ainara, munduko dantzen elkarteak antolatzen du ikastaroa eta Eli Kazakou irakaslea gidatuko du ikastaroa.

Euskal Herriko Dantza Profesionalen Elkarteak (ADDE) antolatuta dantzaren alorrean gaur egun indarrean dauden zenbait ekimenen aurkezpena egingo da azaroaren 1ean Bilbon. "Nor dago dantzan? 1" izeneko ekitaldi honetan lau hizlarik lau proiektu desberdin aurkeztuko dituzte.

Eusko Jaurlaritzaren Kultura Sailak hainbat urtez bultzatu ditu Dantza laguntzeko programak, eta zehazki, Dantzan Bilaka programa, ikus-entzuleei beren lanak erakutsi nahi dizkieten koreografo hasiberrientzat prestatutakoa.

"El esfuerzo y el ánimo" Béjart Ballet Lausanne konpainiaren inguruan Arantxa Aguirrek zuzendutako pelikula da. Maurice Bejart-en ondarea, eta bere ondorengoek konpainiarekin uarrera egiteko esku artean duten erronka dira filmaren ardatza. Bejart Ballet Lausaneren bisitarekin bat eginez Donostian urriaren 19an eta Iruñean 20an eskainiko da.

Azaroaren 27an eta 28an burutuko dira Oiartzunen 9. Herri Musikaren jardunaldiak. Aurten inauteriak izango dira aztergai bertan. Inauterien ospakizun zaharrak, berriki berreskuratutakoak, hutsetik sortutakoak e.a. Igandean Beskoitzeko inauteria iritsiko da Oiartzunera.

Oskorrik bere proiektu berria dela eta, Erreboluzio Frantsesean galdutako Dantza Zahar Birsortuen ingurukoa, DVD grabazio bat egingo du eta grabazio ekitaldi horietan parte hartzera gonbidatu ditu dantzariak. Gasteizen, Bilbon, Donostian, Iruñean eta Baionan egingo dira grabazioak, urrian eta azaroan.

Gorputza sormenaren oinarri gisa eta koreografia sorkuntzaren analisia jorratzen ditu "Dantza kodeak" ikastaroak. Euskal Herriko Unbertsitatean, Leioako kanpusean eskaintzen da ikastaroa, 150 orduko karga izaten du, eta maiatza bitartean irauten du Idoia Zabaletaren zuzendaritzapean. Urriaren 8an da izena emateko azken eguna.

Hamalauzanko elkarteak antolatuta sorkuntza tresnen inguruko tailerra eskainiko du Idoia Zabaleta dantzari eta sortzaileak Donostian datorren urriaren 23an eta 24an. Arte eszenikoetan interesa duten guztientzat dago zuzenduta ikastaroa.