Dokumentuaren akzioak
Albisteak
Tenerifen, hondartza eta dantza artean
San Joan eta San Pedro jaietako opor egunak aprobetxatu eta Tenerifera joan zara. Hondartza eta eguzkiz bapo eginda barrualdeko herriak bisitatzen tentazioa izanez gero harribitxiak aurkitzeko arriskua duzu. Tenerifen hondartza eta eguzkia ziurtatuta daude, baina gune turistiko handien ondoan tradiziozko dantza eder eta interesgarriak aurki daitezke. San Pedroak ospatu berri dituzte Güímar-en, merezi du hango argazkiak ikustea.
Gauargi: hamar urtez munduan gaindi
Ezpeletako Gauargi jaialdiak 10. ekitaldia egingo du aurten. Umeen nazioarteko dantza jaialdia da Gauargi, eta dagoeneko prest dute uztailaren 12tik 17ra burutuko den jaialdiaren egitaraua. Georgia, Sri Lanka, Hego Korea, Serbia, Ukraina eta Kamtchatka herrialdeak ordezkatuko dituzten dantza taldeak arituko dira Euskal Herrikoekin batera.
XXI. mendean atondu
"Atondu, XXI .menderako proposamena" izenburuko liburua aurkeztu da gaur Donostian. Tradiziozko euskal jantziei buruzko liburua da Ane Albisuk egin duena. Baina janzte hutsetik haratago, tradiziozko euskal jantziak prestatzeari edo atontzeari ematen zaio garrantzia lan honetan.
Besta Berri eta Gorputz eguneko dantzak
Gorputz eguna da gaur, nahiko berandu dator aurten eta ia San Joanekin elkartu dira Besta Berriren ospakizunak. Garai batean urteko jai handienetakoa izaten zen Corpus Christi izenekoa, eta hainbat dantza egin ohi ziren jai horretan. Euskal Herrian zenbait tokitan egiten dira dantza gaur egun ere Gorputz egunaren bueltan, baina hori bai, orain Gorputz egunaren ondoko igandean izaten dira ospakizun handienak.
Dantza argitalpenak Karrikirin
Jakinekoa da dantzaren inguruko hainbat argitalpen erosi ahal izatea ez dela nahi bezain erraza gertatzen. Ohiko liburudendetan ez ditugu aurkitzen eta eskuratzeko hamaika buelta egin behar izaten ditugu maiz. Horregatik, pozik hartu dugu Iruñeko Karrikiri elkarteak dantza tradizionalaren inguruko materialari jarri dion harreta berezia. Dantzaren eta folklorearen inguruko hainbat lan eros daitezke dagoeneko Karrikiri dendan.
Gaztedi eta Euskeria abesbatzaren ikuskizuna
Gaztedi Dantzari Taldea eta Euskeria Abesbatzak zazpi herrialdetako dantzez eta kantuez ikuskizuna prestatu dute Gaztediren 55. urteurrenerako. Ekainaren 23an, San Juan gauean Karmelo Plazan izango da. Dantza, kantua eta musika tresna desberdinak biltzen ditu emanaldiak. "Euskal Herria: abesten eta dantzatzen duen herria" da ikuskizunaren izenburua.
Blogak dantzarion eskura
Aukera berri bat eskaintzera dator dantzan.com. Dantza talde, dantzari eta dantza-zale bakoitzak bere bloga egin dezake dantzan.com-en bertan. Taldeko emanaldiak, egitasmoak, gogoetak eta albisteak plazaratzeko espazio izan daiteke. Baina baita dantzari zein dantzazale bakoitzaren leihoa ere.
Udaberria dantzan Donibane Lohizunen
Zazpi herrialdeetako dantza taldeen emanaldiak ikusi ahal izango dira datorren ekainaren 10ean, larunbatean, Donibane Lohizunen ospatuko den Udaberria dantzan jaialdian. Euskal dantza taldeekin batera Okzitaniako talde bat ikusteko aukera izango da.
Mutxiko eta kantu eguna Irunen
Euskal Kostaldeko Nazioarteko Erakustazokaren baitan, mutxiko eta kantu eguna antolatu dute datorren ekainaren 11rako Irunen. Igande goiz partean dantzak eta kantak tartekatuko dira Ficoban.
Arabako Dantzari Eguna Agurainen
Igandean, ekainaren 11n, ospatuko da Agurainen, Arabako Dantzarien Biltzarrak antolatutako Arabako Dantzari Eguna. Mila dantzaritik gora espero dituzte Agurainen eta ekitaldi nagusia bi plazatan, aldi berean, egingo da.
Dokumentuaren akzioak
