Dantzan ospatuko dugu Euskararen eguna, igandean

Heldu den igandean, azaroak 30, Euskarak 365 egun ekitaldia eginen dute Iruñean, euskararen eguna ospatzeko. Iruñeko Karrikiri, Zaldiko Maldiko, Txantreako Biltoki, Atarrabiako Karrikaluze, Berriozarko Zorroka elkarteak eta Euskalerria Irratia dira ekitaldiaren antolatzaile. Zerbait xumea izanen da: Manifestuaren irakurketa eta soka-dantza. Ekitaldi xumea, baina guretako garrantzitsua. Gisa honetako ekitaldi baten erdian, plater nagusi gisa, dantza txertatzea... zer esanen dizeugu ba, ez gaude ohituta. Aukera bikaina dugu beraz, Iruñeko euskaldunok, elkarri eskutik helduta, hiriaren bihotzea "Gu ere hemen gaude" dantzan esateko!

Hau izanen da igandeko programa zehatz-mehatz:

• 11:00 hamaiketakoa Zaldiko Maldiko elkartean (bitartean soka-dantzaren eta kantuaren ikastaro azkarra)
• 12:55 Soka-dantzan, udal plazara
• 13:00 Ekitaldia udal plazan

                 Manifestua irakurtzea (Aitor Etxarte) / Soka-dantza (kantatua, Dugunako musikarien laguntzarekin)

San Fermin Aldapakoaren egunean dantzatu ohi dugun soka-dantza dantzatuko dugu beraz, nahi dugun lagun guztiok. Dantza irekia izanen dela, alegia. Julio Soto bertsolariak, bertso berriak atondu ditu egun honetarako. Hauexek (Xenpelarren "Iya guriak egin du" doinuarekin kantatzekoak):

1) Mundu hau da guztiona

kolorea dariona (bis)

Hizkuntza mundu zati 

berezia den bati 

zentzu emanten diona (bis)

2) Nafarroan buruz-buru

Iruñea hiriburu (bis)

Pozez, alaitasunez

eta askatasunez

euskara bizi nahi dugu! (bis)

3) Ahaztu gabe atzo, gero

guk gaur nahi dugu hitz bero (bis)

Aupa! Mingainak blaitu!

Euskarak behar gaitu

egunero-egunero (bis)

4) Lantokian, mahai bueltan

asteroko erosketan (bis)

Indartzeko gehiago

handitasuna dago

une txiki horietan (bis)

5) Ale txiki bat eskatzen 

handiagoa eskaintzen (bis)

Izateko desioz

jarraitu ilusioz

kaleak koloreztatzen (bis)

6) Bakoitzak bere esparruan

txingurriaren larruan (bis)

Amets egin, aritu

borrokatu, sentitu

bihotza mingain barruan (bis)