Aintzane Revuelta Ortega zuzendari eta dantzariak sortutako antzerki eta dantza ikuskizuna estreinatuko da urriaren 8an Donostian, Urgull-eko Guardetxean. Frida Kahlo pertsonaiaren bizitzan oinarritzen da Banda Bat elkarteak ekoiztutako lana.

Euskal Herriko Dantza Profesionalen Elkarteak (ADDE) bi ikastaro antolatu ditu urria eta azarorako. Koreologia ikastaroa eskainiko du Eva Recachak eta "eszena ekoizpen" ikastaroa eskainiko du Pio Ortiz de Pinedok.

Datorren urriaren 10ean ospatuko da Mutxiko Eguna Arrangoitzen. Dantza-jauziak edo mutxikoak dantzatzeko aukera asko zabaldu da azken urteotan, eta horien aitzindarietako bat eta dantza mota honen festa egun handiena da Arrangoitzek urrian ospatzen dena.

Jesus Mari Garate irakasle dela, Gipuzkoako urrats eta dantzen inguruko ikastaroa antolatu du EDBk. Urriaren 9tik 30era izango da ikastaroa, urriko lau larunbatetan, eta Beasainen burutuko dira saioak.

Datorren urriaren 3an, igandean, Errosarioko Amaren ezpata-dantza bigarren aldiz eskainiko dute Elgoibarren. Haritz dantzari taldeko dantzariak, Elgoibarko Udalaren txistulari banda eta eskopetariak meza ostean aterako dira ezpata-dantza egitera.

Durangaldeko dantzen agerraldia da Dantzaroa, eskualdeko dantzak ezagutzera eman eta dantzariak jai giroan elkartzeko helburuz antolatzen dena. Gerediaga elkarteak bigarren urtez antolatu du eta irailaren 25ean, larunbatean, ospatuko da Durangon.

Iaz estreinatutako ezpata-dantza bigarren aldiz eskainiko da igandean, irailaren 26an, Iruñean. Duguna dantza taldeak San Fermin Aldapakoaren ezpata-dantza jarri zuen abian eta urtero urtero eskainiko du iraileko festan.

Laguntasuna Kultur Elkarteak dinamizatutako euskal dantza tradizionaleko monitoreen formakuntzarako "Dantzazale" proiektua, Barakaldoko Clara Campoamor Kultur Etxean martxan jarriko da datorren urriaren 23an.

Aipatu izan dugu lehen ere Pello San Millan-ek elikatzen duen Baztango Haizegoa bloga. Artikuluak gusto handiz, ondo dokumentatuta eta irudi ederrez dokumentatuta argitaratzen ditu. Baztango historia, etnografia, tradizioak eta dantzak ezagutzeko iturri oparoa da Baztango Haizegoa. Mutil-dantzen inguruan eta Maiatzeko Erreginen inguruan egin dituen artikuluak adibide.

Datorren urriaren 2an eta 3an ospatuko da Donibane Garazin T.Dantz jaialdia. Dantza garaikidea, kale-dantza eta tradizionala Garaziko kaleetara eramango du jaialdiak. Leandre eta Claire, Group Berthe, Dantzaz, Dan6t, Duguna, Garaztarrak eta Erregotxopitak taldeek parte hartuko dute jaialdian.