Altzürüküko gazteek prestatu zituzten maskaradak 1968. urtean. Jean Dominique Lajoux zinemagile eta antropologo frantsesa Europako maskaraden inguruko ikerketa egiten ari zen garai horretan. Zuberoako maskaradak ikertzeko asmoz jo zuen bertara, eta Altzürüküko maskaradariek Pagolan eta Ligi-Atherein eskainitako emanaldiak grabatu zituen. Dokumental horixe dugu hemen ikusgai, 27 minutu orain 44 urteko maskaradetara bidaiatzeko.

Dantza Hirian jaialdiak, Dantzatzen Diren Hirien sarearen DCode ekimena bultzatu du 2012an. Hendaiako kaleetan ibilbide bat eginez, smartphoneekin QR kodeak irakurri eta ingurune horiekin lotutako dantza-bideoak ikusteko aukera ematen du. Eneko Balerdi, Eneko Alkaraz, Eneko Gil, Jon Maya eta Joxe Mari Peso dantzarien pieza bana ikus daiteke ekimen honetan.

Azaroaren 2an eta 3an, "M eme M" ikuskizuna eskainiko dute Olaeta Balletek Bilboko Arriaga antzokian. Jon Maia bertsolariaren gidoia du ikuskizunak eta koreografo lanetan Begoña Crego, Jone Goirizelaia, Mari Carmen Muñoz, Ines Uriarte eta Koldo Zabalak aritu dira. Et Incarnatus Orkestraren musika, eta Jon Maia eta Amets Arzallus bertsolarien parte hartzea izango du ikuskizunak.

Portugaleteko Elai Alai kultur elkarteak 50 urteurrena betetzen dihardu 2012an. Ibaizabalen ezkerraldean sortutako elkarteak ibilbide oparoa eta mamitsua izan du eta horren erakusgarri izaten ari da urteurren ospakizuna. Elai Alairen mende erdiko ibilbidea ezagutzera emateko lanekin batera, ikuskizunak, musika jaialdiak eta ekitaldi bereziak izaten ari dira.

Gaurtik igandera ospatzen da Argentinako Rosario hirian "Semana Nacional Vasca" izeneko euskal festa handia. Argentinako hainbat herrietako dantza taldeen ondoan, Euskal Herritik Algortako Itxartu dantza taldea arituko da dantzan, gaurtik igandera bitartean.

Gipuzkoako Foru Aldundiaren Dantzaguneak dantza-sorkuntza bultzatzeko programan "Sortutakoak tradizionala" deialdia egin du 2012an lehen aldiz, eta Mikel Sarriegik Aurtzaka taldearekin egindako Neskatxen esku-dantza izan da hautatutako proiektua.

2011/12 denboraldiko munduko dantzarien Top 100 zerrenda egin du Dance Europe aldizkari ingelesak, eta bertan, hiru euskal dantzari ageri dira: Lucia Lakarra, Alicia Amatrian eta Asier Uriagereka. Horietako bi, Bilbon ikusi ahal izango dira dantzan asteburu honetan, Euskaldunak eta Dantza 8. Jaialdian.

Batzuetan ezusteko loturak gertatzen dira rock eta folk dimentsioen artean. Queen talde mitikoak espainiar musika baliatu zuen Innuendo kantan. Bideoklipa egiterakoan tarte batean dantza irudi batzuk agertzen dira. Ingurutxo bat dantzatzen ageri da herritar multzo bat. Menendez Pidalek 1920-30 inguruan egindako grabazioetako irudiak dira. Tietar bailaran, Avila aldeko herri batean grabatutako ingurutxo baten irudiak izan daitezkeela uste da. Baile del rondon deitzen diote ingurutxoari Gaztelako eskualde horretan.

Zarautzen, beste herri askotan bezala, antzeko lana egiten zuten bi dantza talde izan dira luzaroan. Orain bi taldeak elkartu eta bakarra osatuko dute. Horixe jakinarazi dute agerraldi publiko batean.

Hauteskundeak daude igandean Euskal Autonomia Erkidegoan, eta Legebiltzarra eta Eusko Jaurlaritzan gobernua osatzeko alderdi politikoek aurkeztu dituzten gobernu programetan dantzaren alorrean agindu dituztenak bildu ditugu. Hona zer espero daitekeen dantza aldetik datorren legealdian.