Maskarada berriak, betiko maskaradak

Udaberri zaporeko urtarrila honek utzi digun asteburuetako bat probestu dut, Muskildin, Sohüta-Hokiko gazteek atondutako maskaradak ikustera joateko.

Emanaldiak hasi aitzineko elkarrizketek ikusmina sortu zidaten: Xorrotxik ez zela izanen eta haien ordez artzaintsa eta axuriak plazaratuko zituztela, Buhameen ordez Buhaminek jokatuko zutela eszena hori, Kherestuen ofizioa goizera pasako zutela...

Ikusmin horrek janda hurbildu nintzen Muskildiko arrabotira. Lehen begi kolpean ez lirateke aldaketa ikaragarriak ere, baina ikusgarriak aurrera egin ahala sorpresaz beteriko maskaradak ikusten ari ginela konturatu ginen. Saiatuko naiz (sobera) spoilerrik egin gabe, sorpresa horiek aletzen:

Kherestuen ofizioa goizera pasa izanak, Xorrotxik ez egoteak eta Buhameen tokia Buhaminek hartzeak, arratsaldeko emanaldi erabat berria ekarri zuen. Ohikoak izaten diren ofizioetatik Marexelena eta Kauterena bakarrik! - ezin maskaradak Zamaltzain, Kabana eta Pitxurik gabe imajinatu-. Pikutara Manexaren gidako 7. puntua!

Hala, sorpresak tantaka agertzen hasi ziren:

Hasteko Xorrotxik ez, eta beraz, ofizioak beste lagun batzuek aurkeztu zituzten.

Buhaminen taldea nortasun handikoa, umorez bete bezain basak, aldarrikapen irmoekin, freskoak!. Zenbait zalantza etorri zitzaikidan burura hala ere: genero bereizketa argi hori beharrezkoa ote zen, umore kolpeak gehienetan generoaren ingurukoak izatea hain zuzen eta Buhameek egin ohi duten ezpaten dantza ordezkatua behar ote zuen. Zalantzatxoak.

Artzaintsen ofizioa ere berria baina betikoa, Buhaminenean bezala, hartzaren partaidetzarekin eta haize boladatxo freskoa berdin.

Azpimarratzekoa iruditzen zait ere aitzindarien lan txukuna. Talde eder eta homogeneoa aurtengoa!

Eta hala ere, aldaketak-aldaketa, betiko maskaradak ikusi genituen sentsazioarekin itzuli ginen Manexeneara.

Kabanak bere predikuan bota zuen aspaldiko maskaradarik tristeenak direla aurtengoak. Egi borobilak maite ditu Kabanak, baina honakoan, ez kasurik egin!