Hitzaldien karietara, eztabaidarako 2 gai

2006/12/01
Joxemielek hitzaldia bukatuta gauza oso interesgarriak bota zituen eta aparte jartzeko adinako pisua badutela iruditu zait:

  • Gaur-gaurkoz dantzari ez zaio garrantzirik ematen instituzioetatik. Nafarroako adibidea jarri zuen Joxemielek: Nafarroako dantza talde guztiek huelga eginen balute haien egoera salatzeko adibidez, zeozer gertatuko ote litzateke? erantzunik izanen ote litzateke erakundeen aldetik? Ez dirudi. Baina aldiz, Otsagabian adibidez, danzanteek dantzatzeari utziko baliote? Herriak faltan botako lituzke dantza horiek. Hor dugu lan-ildoa. Dantza prestijiatu behar dugu.

  • Beste adibide bat jarri zuen Joxemielek: Nafarroako Gobernuak Tuterako dantza taldea hautatu du Yamaguchi-rako bidaian nafar kulturaren ordezkari izan dadin. Hori Joxemielendako iraina da (haien webgunea irakurtzea besterik ez dago). Baina dantzaren munduko inor ez da kexatu horretarako pisuzko argudioak dauden arren.

Ba hoixe, zuen txanda!
Irune
Irune
2006/12/02 18:45
Larunbatean hitzaldiaren ondorengo solasaldian hitzaldian beste ikasi genuen. Gauza interesgarriak aipatu ziren eta zuk aipatu bezala luze mintzatzeko emanen dutenak. Aipatu zuen dantzarion grebarena, eta han geunden guztiok pentsatu genuen inori ez zaiola inporta, gu greban jarri ezkero ez zuela inork gure falta somatuko. Otsagabiako adibidea jarri zuen. Ni pentsatzen egon nintzen gero, Iruñeko egoerari buruz. Benetan inork ez lituzke faltan somatuko Iruñeko Udal dantzariak? Ba nik behintzat pena handia hartuko nuke. Agian batenbat poztuko zen dantzaririk ikusi behar ez izateagatik baina Iruñea bertako politikariak baino zabalagoa da eta askok somatuko genuke hutsune hori. Hala ere ez da kasualitatea denok pentsatzea dantzariak desagertzea arazo handiegia ez zela izanen. Dantza prestijiatu behar hori nahiko argi ikusi zen.
aritz
aritz
2006/12/05 09:48
Dantza prestijiatu baina nola? Ni askotan irtenbide orokorretan pentsatu izan dut, baina agian bidea bakarka egin beharra dago, tokian-tokiko erantzunak emanez tokian-tokiko egoerei. Joxemielek beste gauza garrantzitsua esan zuen: hitzegin beharra dagoela. Dantzarion artean izugarrizko komunikazio falta dagoela (inbidiak, rollo txarrak, dantzaren ikuspegi ezberdinak tarteko), eta arazo horien gainetik dantzarion funtzioa zehazten saiatu beharko genukeela, dantzaren erreformatzaile berriak izan gaitezen.