Dokumentuaren akzioak
Albisteak
Dantza afitxetan
Lizarrako Francisco Beruete dantzari ohien elkartearen urteroko ahalegina izaten da dantzarekin lotutako erakusketa antolatzea. Aurten ere antolatu dute azaro bukaera eta abendu hasiera bitarte. Dantza afitxetan. Azken urte eta hamarkadetako dantzarekin lotutako kartelak erakutsi dituzte.
Dantza-estiloaren transformazioaz hitz batzuk
Uda partean, hasi ekainetik eta irailaren bukaera bitartean, bada oraindik dantza-erromeria ikusteko eta disfrutatzeko aukerarik gure bazterretan. "Erromeria" hitzaren esanahia oso zabala izanik, esan beharko dut artikulu honetan nolabait ere "estilo zaharreko" erromeriaz ariko naizela, edo sikiera guk estilo zaharrekotzat jotzen dugun erromeri klase horretaz: trikitixaren erritmora, auzo txiki edo mendialdeko ermita baten gerizan, fandangoa eta arin-arina bata bestearen atzetik "mandioko eran" dantzatzen diren erromeri horietaz alegia.
Zergatik egiten ote dugu dantzan?
Jatea gustuko dugu janariak ematen digun energiarik gabe ezingo ginatekeelako bizi. Sexua atsegin dugu horri esker gaudelako hemen. Baina zergatik egiten dugu dantzan? Eduard Punset idazleak Lawrence Parsons neurozientifikoa elkarrizketatu du berriki, "Redes" izeneko bere saioan. Parsonsek dantza-musika eta gizakiaren arteko harremana aztertzen du. Punsetek hori galdetu dio: zergatik atsegin du gizakiak dantzan egitea?
Arteleku dantzagune bihurtzen hasi da
Donostiako Loiola auzoan dagoen Arteleku egoitza dantzarako gune bihurtzen hasi da. Tabakalera berriak lehen Artelekun burutzen ziren hainbat ekintza jasoko ditu eta ondorioz Artelekuri norabide berria emango dio Foru Aldundiak. Dantza izango da norabide berri horren zutabeetako bat. Lehen ere bazen dantza gela bat Artelekun. Gaurtik aurrera Dantzaz elkarteak bertan izango du bere egoitza.
"Dantzari bikaina saria" eskuratu du Eneko Gil-ek Madrilen
Madrileko XXII. Koreografia SAriketa ospatu berri da eta hainbat euskal ordezkari izan dira bertan. Natxo Montero eta Asier Zabaletak hainbat aipamen jaso dituzte eta Ertzarekin aritu den Eneko Gilek "dantzari bikainari saria" eskuratu du. Estatu Batuetan sei astez egonaldi bat egiteko eta New YOrk-eko Movement Research-eko tallerretan parte hartzeko beka bat dira Gilek irabazita sariaren osagarriak.
Espainiako Dantza Saria Juan Carlos Santamariari
Juan Carlos arlos Santamaria koreografo donostiarrak irabazi du Espainiako Dantza Sari Nazionala sorkuntza arloan. Interpretazio arloan Javier Baron-ek jaso du. Donostian jaio eta 11 urterarte bertan bizi izan zen Santamaria, gero Valladolidera jo zuen eta han egin zituen lehen dantza ikasketak. Espainiako Kultura Ministerioak ematen duen saria horrek 30.000 euro ekarriko dizkio Santamariari.
Dancilla Youtubera heldu da
Nazioarteko dantza tradizionalen inguruan dagoen webgune interesgarrietakoa da Dancilla. 30.000 dantzaren fitxa, 1.000 dantza argibide, 1.000 dantza bideo inguru... Orain bideo horietako batzuk Youtuben topa ditzazkegu.
Dantza argazkiak Life aldizkarian
Googlek Life aldizkariaren argazki artxibo osoa argitaratu du berriki. Life argazkilaritza oinarri izan duen aldizkari estatubatuarra da. Gaur egun interneten argitaratzen da soilik. XIX mendetik hasi eta gaurdainoko milaka argazki dira Googlek zintzilikatu dituenak. Horien artean batzuk dantzarekin zerikusia dutenak.
Herrien Arteko XII. Folklore Jaialdia Barakaldon
Abenduaren 5, 6 eta 7an Herrien arteko XII. Folklore Jaialdia egingo da Barakaldo Antzokian eta Portugaleteko El Carmen Ikastetxean. Barakaldoko Ibarra-Kaldu taldeak antolatzen du jaialdia, eta aurtengo talde gonbidatuak "Museo de la Huerta" kantu eta dantza taldea (Alcantarilla-Murtzia) eta Alba de Tormes-eko Folklore Taldea (Salamanca) dira. Jaialdiak emanaldi mota bi ditu: musika entzunaldia eta dantza emanaldiak.
Dantza egitea dantza ikustea baino nahiago omen dugu
Eusko Jaurlaritzaren baitako Kulturaren Euskal Behatokiak kultura kontsumoari buruzko ikerketa plazaratu du berriki. "Kultura-ohiturei, jardunbideei eta kontsumoari buruzko estatistika Euskal Herrian 2007-2008" izeneko ikerketa hau egiteko Eusko Ikaskuntzaren eta Euskal Kultur Erakundearen laguntza izan du Behatokiak eta bertan, euskal lurralde guztietako datuak bildu dituzte. Dantzari buruzkoak ere bai. Horietatik ondorioezta dezakegu nahiago dugula dantzan egitea dantza ikustea baino.
Dokumentuaren akzioak
