Dokumentuaren akzioak
Albisteak
Alurr dantza taldea Zaldibian
Zaldibiko dantzariekin batera, ordubeteko emanaldia egingo dute pilotalekuan eta kaleetan, apirilaren 9an, arratsaldeko 19:00etatik aurrera.
Dantzaz Blai, IV. Gazte Balleten Topaketak
Apirilaren 1ean hasi ziren Dantzaz Blai, IV. Gazte Balleten Topaketak. Luhuso eta Donostian ospatzen ari diren topaketa hauek hilaren 10ean amaituko dira. Aurten, Ingalaterrako Verve eta Suitzako La Marchepied konpainiak etorriko dira gurera, Dantza konpainiari esker.
Etxea bikotearen Exstrada kale ikuskizuna
Exstrada kale ikuskizuna aurkeztu du duela gutxi Etxea dantza bikoteak. Azken lan horrek egunerokotasuna hautsi nahi du gorputz espresio eta inprobisazioaren bidez momentuan kalean dabiltzan pertsonekin elkareragiten. Frédéric Etcheverry eta Gloria Arasek osatzen duen Etxea bikoteak hainbat alditan eskainiko du Exstrada kale ikuskizuna datozen hilabeteetan.
Still standing you, La Fundicionen
Datorren apirilaren 9 eta 10ean, arratseko 20:00etan hasita Pieter Ampe eta Guilherme Garrido dantzari eta koreografoek euren "Still standing you" lana eskainiko dute La Fundicion aretoan. Ikuskizun hori "18 urte gorakoentzat" programaren barruan dago kokatua.
Verdini Donostiako giza eskubideen zinemaldian
Verdini Dantza Taldeak, Donostiako hiritar merituaren domina duenak, 2010. urtean estrenatutako bere zazpigarren ikuskizuna, Dantzaria naiz, aurkeztuko du datorren apirilaren 9an, arratsaldeko 16:30etan, Victoria Eugenia antzokian. Ikuskizuna Donostiako Giza Eskubideen bederatzigarren zinemaldiaren programa barruan aurkeztuko da.
Izpurako kabalkadek 30 urte beteko dituzte
Apirilaren 24an, igandez, herriko kabalkaden 30. urteurrena ospatzeko libertimendua edo kabalkada egingo da Izpuran. Egun horretarako, herriko gazteek deialdi bat egin dute bertako adinekoek festan parte hartu dezaten.
Inauteri hotsak Soinumapa.net-en
Soinumapa.net Euskal Herriko Soinu Mapa egitasmo irekia da. Fonografia edo gure inguruko hotsak grabatzeko artea oinarritzat hartuz, landa grabaketak erakutsi, kontsultatu eta elkartrukatzeko balio duen webgunea da hau. Bertan, Euskal herrian zehar egindako hainbat grabaketa entzun ditzazkezu: hirietako zaratak, mendialdeko giroak, animaliak, ospakizunak, lekuak, gertakizunak… Igo dituzten azken grabazioak duela hilabete eskas iragan diren inauterietakoak dituzue.
La Fundicionen, 18 urtetik gorakoentzat programa
Erotismoa eta sexua gizarteari eta kulturari lotuta daude. Erotikoa den oro pornografiko gisa hartzen da. Sexua interneten gehien bilatutako orrialdeadea da, horregatik, esan dezakegu denoi arduratzen gaituen zerbait dela. Gure gizarteak pornografia eta erotika, artea eta sexua... desberdintzera jotzen du. Kontu horiek planteatuko dituzte apirilean eta maiatzean La Fundicion aretoan aurkeztuko diren proposamen ezberdinetan. Hortaz arituko dira "18 urtetik gorakoentzat" deituriko dantza eta antzerki zikloan.
Henri Coursaget zendu da
Henri Coursaget, Confolenseko jaialdiaren fundatzaile eta berrogeita hamar urtez lehendakari izandakoa, joan den martxoaren 21ean zendu zen 86 urte zituela. Festibal xume bat jarri zuen martxan Henrik 1958an, baina, urteak joan ahala mundu mailako jaialdi garrantzitsuenetariko batean bilakatu da Confolenseko jai handi hau.
Egun bat publikoarekin
Saio honetan Gelabert-Azzopardi dantza konpainiako koreografia baten sortze-prozesuaren parte bihurtzen dira ikusleak. Egun batean zehar sortze eta interpretatze lan koreografiko interaktibo bat burutuko da. Publikoarentzat irekia eta publikoarekin egitekoa den jarduera honen bidez ikusleekin komunikazio artezago bat ezartzea bilatzen du konpainiak, sentsazioaren eta komunikazioaren klabeetan arakatuz eta agerian utziz artea eta haren gaineko pertzepzioa prozesu konplexuak eta irekiak direla.
Dokumentuaren akzioak
