Besta Berriren estreinaldia Bilboko Arriagan

HARITZ EDT

2012/11/27 17:42

Azken hamarkadetan Juan Antonio Urbeltzekin eta bera zuzendari den Donostiako Argia taldearekin izandako elkarlanari eutsiz, beste behin ere Bilboko Arriaga antzokian dantzatzeko aukera izango dugu Haritz euskal dantzari taldeko kideok. Abenduaren 2an izango da hain zuzen ere Besta Berri ikuskizun berriaren estreinaldia, arratsaldeko 7etan, eta bertan izango gara Eibarko Kezka, Donostiako Argia eta Iruñeako Dugunako kideekin batera.

Argia: Muriska. Argazkia: Lamia.

“Bestaberri jaia, urtero, solstizioaren jaia baino apur bat lehenago egiten da. Ziur ez dakigun arren, baliteke Urbano IV.a aita santuak 1264an jaia ezartzea ekainaren 24an San Joan Bataiatzailearen irudiaren inguruan egindako ospakizun paganoak kristautzeko ahalegina izatea… Inspirazio-iturriak izan dira Bestaberri jaiari buruzko testua eta Donostian 1659ko maiatzean egindako ezpata-dantzak, Maria Teresa Austriakoaren eta Luis XIV.aren arteko ezkontzaren barruan.

Hiru pieza gehiago antzeztuko dituzte: Lapurdi eta Nafarroa Behereko prozesioak; Jorge Oteizaren apostoluen aurreskua, Oñatiko prozesio-ohiturei eta dantza-ohiturei helduta, eta Zuberoako herri-antzerkian oinarritutako turkoen eta kristauen pastorala”. Halaxe azaltzen ditu Juan Antonio Urbeltzek bere azken ikuskizunaren nondik norakoak. Gehiago jakin nahiez gero abenduaren 2an Arriagara hurbildu eta ziur gozatuko duzuela.