Edukira salto egin | Salto egin nabigazioara

Tresna pertsonalak
Hemen zaude: Hasiera Komunitatea HARITZ EDT 50 urtez Haritz

Dokumentuaren akzioak

50 urtez Haritz

2023/03/04 11:55
50 urtez Haritz

25. urteurrenean, 1998an, Haritz EDTko kideek 1973ko soka-dantzariekin ateratako argazkia

Hamaika izan dira bizipenak, hamaika izan dira emanaldiak, hamaika izan dira bidaiak, hamaika taldetik pasatu diren dantzariak, baina aurten 50 urte izango dira 1973 hartan Elgoibarko zenbait gaztek San Bartolome eguneko (abuztuak 24) soka-dantza berreskuratu zutenetik. Urtemuga berezi hau ospatzeko logo berria ere estreinatu dugu, Xabier Laka Antxustegi eta Ane San Martin Iriondoren eskutik.

                                                                         

50. urteurreneko logoa
50. urteurreneko logoa, Xabier Laka Antxustegi eta Ane San Martin Iriondoren eskutik

Taldea 1973. urtean sortu zuten Elorra, Ongarri eta Elgoibarko Izarrako dantza eskoletan ibilitako hainbat dantzari eta txistularik San Bartolome egunean soka-dantza plazaratzeko. Hala ere, ordutik taldetik ehunka dantzari pasatu dira, eta urte hauetan guztietan urtero lau ekintza nagusi izatera iritsi gara:

  • San Bartolome eguneko soka-dantza (abuztuaren 24an).
  • Nazioarteko Folklore Jaialdia, 1987tik (uztaila bukaeran).
  • Errosarioko Amaren Ezpata-Dantza, 2009tik, Juan Antonio Urbeltzekin elkarlanean ezpata-dantza berreskuratzeko egindako ikerketa eta lan sutsuaren ostean birplazaratu genuenetik (urriaren 7aren, Errosarioko Amaren egunaren, bueltan).
  • 'Plazara dantzara' erromeria. Urteko azken larunbatean (ia beti), Gabon Zahar Feriaren baitan.

XXXV. NFJ talde argazkia
2022. XXXV. Nazioarteko Folklore Jaialdiko talde-argazkia
2022. XIII. Errosarioko Amaren Ezpata-Dantza
2022. XIII. Errosarioko Amaren Ezpata-Dantza
2022ko San Bartolome eguneko Soka-dantza
2022ko San Bartolome eguneko Soka-dantza
2022. Plazara Dantzara erromeriako talde-argazkia
2022. Plazara Dantzara erromeriako talde-argazkia

 Lau emanaldi nagusi horiez gain, Elgoibarko auzoetako jaietan nahiz Euskal Herriko txokoetan dantzatzen dugu. Baina Euskal Herritik kanpora ere bidaia asko egin ditugu, gure kultura eta dantzak munduan zehar oholtzaratuz.

Urte hauetan guztietan ehundaka eskuk osatu dute gure soka, eta horien guztien omenez, baina baita gaur egunera eta etorkizunera begira ere dantza, kantu eta alaitasunez bete nahi ditugu gure herriko kaleak aurten. Dantza kaleetatik oholtzetara igaro zen moduan oholtzetatik kaleetara itzul dadin. Herritar guztiengana hurbildu nahi dugu, dantza barrutik bizi dezaten.

Eta ospakizun horien guztien ardatza ekainaren 17ko HARITZ EGUNA izango da. Goiz eta eguerdian trikipoteo bat egingo dugu. Ondoren, Elgoibarren dantza munduan ibili diren dantzari guztiak gonbidatu nahi ditugu egingo dugun dantzari-bazkarira. Arratsaldean txaranga edo elektrotxaranga bat ibiliko da kalean eta gauean Fan&Go taldeak amaituko du eguna erromeria batekin. Dantza taldeko zapi, kamiseta eta edalontziak ere aterako ditugu.

Hementxe egitarau guztia:

HARITZ EDT 50. URTEURRENEKO EGITARAUA
50. urteurreneko egitaraua

Martxoak 12: Aurresku txapelketa, 11:00etan Herriko Antzokian.

Martxoak 25: Dantza jaialdia, 12:30ean Kalegoen Plazan (euria eginez gero, Herriko Antzokian). Portugaleteko Elai Alai, Galdakaoko Andra Mari eta Donostiako Argia dantza taldeak etorriko dira dantza egitera, Haritz Euskal Dantzari Taldearekin lotura estua izan duten taldeak. Arratsaldean, Inguma taldearekin erromeria.

Apirilak 22: Korrotik Pikutara. "Dantzaren historia dantzan". 12:30ean Kultur Kafean. Korrotik Pikutara erromerietako dantzen historiadantzatu bat da, dantza-emanaldi didaktiko bat da "Korroan, borobilean hasi eta sokadantza, ingurutxo, kontradantza eta bikote dantzetatik pasa ondoren, soltean, bakarka eta noraezean edo pikutan bukatuko dugu. Dantzaren historia dantzan jarriko dute, aldi berean pedagogikoa eta entretenigarria izan nahi duen dantza emanaldian" (Dantzan.eus, 2021).

Maiatzak 6: Erraldoi topaketa. Goizean Kalegoen Plazan egingo dute erakusketa, eta ondoren, kalejira abiatuko dute. 11:00etan Kalegoen Plazatik Maalako parkeraino, berriro Kalegoenen amaitzeko. Barañaingo Ezpelur, Tafallako Asier Marco, eta Iruñako Buztintxuri konpartsak etorriko dira. Hiru konpartsetako erraldoien figurak dantzariak dira, dantza desberdinak errepresentatzen dituztenak. Arratsaldea musikarekin alaituko dugu.

Ekainak 17: Goiz eta eguerdian trikipoteo bat egingo dugu. Ondoren, Elgoibarren dantza munduan ibili diren dantzari guztiak gonbidatu nahi ditugu egingo dugun dantzari-bazkarira. Arratsaldean txaranga edo elektrotxaranga bat ibiliko da kalean eta gauean Fan&Go taldeak amaituko du eguna erromeria batekin. Dantza taldeko zapi, kamiseta eta edalontziak ere aterako ditugu.

Uztailak 21: XXXVI. Nazioarteko Folklore Jaialdia. Urteroko zita, atzerriko bi talde gonbidatu eta Haritz EDT dantzariok dantzatuko dugu.

Abuztuak 24: Soka-dantza. Bertan 1973ko soka-dantzariak omenduko ditugu, egun hori izango baita zehazki Haritzek 50 urte beteko dituen eguna.

Abuztuak 27: LXXXVI. Elgoibarko Dantza Solte Txapelketa. Urteroko zita.

Irailak 8-17: Argazki eta bideo erakusketa Kultur Etxean. 1973tik aurrera bildu ditugun argazki, bideo eta zenbait dantza-arroparen erakusketa egingo dugu Kultur Etxean.

Urriak 7: XIV. Errosarioko Amaren Ezpata Dantza. Urteroko zita da hau ere, baina aurten Errosarioko Amaren egunean bertan dantzatuko dugu.

Urriak 21: Dantza jaialdia. 12:30ean Kalegoen Plazan (euria eginez gero, Herriko Antzokian). Azkeneko urteetan harreman handiena izan dugun bi dantza talde gonbidatuko ditugun, eta guk geuk ere dantzatuko dugu.

Azaroa (eguna zehazteke): Mikel Sarriegiren hitzaldia, Gipuzkoako zenbait dantzen historiaz.

Abenduak 30: Plazara Dantzara. Urteroko zita. Urtea amaitzeko, harrobiko dantzari gaztetxoenetatik hasi eta dantzari beteranoetarainokoak elkartuko gara dantzarako.

 

 

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

HARITZ EDT

HARITZ EDT

Haritz Euskal Dantzari Taldea

ELGOIBAR | 1973

Posta Kutxa: 183

20870 Elgoibar

Kontaktua:

Tfnoa: +34 686 63 31 78

Email: haritzdantza@gmail.com

Instagram: @haritzedt