Orain arteko ekarpenak

Datorren asteburuan, maiatzaren 27tik 29ra, Olatu Talka izeneko jaialdi berezia ospatuko da Donostian. Hiria 2016 urtean Europako Kultur Hiriburu izateko hautagaia da, hautagaitza hori bultzatu nahian antolatu da asteburu horretarako Olatu Talka bigarrengoz. Jaialdia osatzen duten osagaiak herritarrek proposatu eta bultzatu dituzte, horixe du jaialdiak ezaugarri bereziena. Hainbat dantza ekitaldi izango dira tartean.

Aniez Perez-ek "Dantza aste bat Euskal Herrian" eta "Dantz'Hadi" programak prestatu ditu datorren uztailaren 9tik 16a bitarte. Ahetzen eta Arbonan ospatuko diren jaialdiok dantzak ikasi eta lantzeko egonaldi bat izango dira, lehenengoan dantza tailerrak nagusituko direlarik eta bigarrenean, aldiz, dantzarako erromeriak. Valonia-Kataluniako 21 boutons eta Auberniako Komred izango dira aurtengo Dantz'Hadi jaialdiko gonbidatuak.

Eusko Ikaskuntzaren Folklore sailak dantza soltearen inguruko jardunaldiak antolatu ditu. Aragoi, Asturias, Extremadura, Galizia eta Euskal Herriko ikertzaileek gaiaren inguruko ikerketa lanak eta gogoetak aurkeztuko dituzte datozen bi larunbatetan Eibarko Portalea Kultur Etxean.

Joseba Sarrionandiaren olerki musikatuak dantzarako oinarri hartuta Dantzaz Konpainiak, Lekeitioko Nazioarteko Kale-Antzerki jaialdirako, Sarritsasoa sortu du. Lan hori, datorren uztailaren 8 eta 9an eskainiko du konpainiak Lekeitioko Isuntza hondartzan.

Datorren ekainaren 4 eta 5ean, Gipuzkoako Dantzagunean, bideoa eta dantza uztartuko dituen mintegia eskainiko du Nicole Seiler koreografo eta dantzariak. Espazioan bideoa nola erabili; bideoa argiztapen iturri bezala nola erabili, ez soilik irudi bezala; pantaila ez diren beste euskarrietan bideoa proiektatzea... landuko da besteak beste Hamalauzanko elkarteak antolatutako tailer horretan.

Aurten ere abian da Gasteizko Udal Folklore Akademiak antolatzen duen Dantza Plazan zikloa. Udaberri eta Udako hainbat ostiraletan, oro har, Gasteizko plaza ezberdinak hartuko ditu egitasmoak. Akademiako musikariek dantza doinuak interpretatuko dituzte plazetara bertaratzen diren dantzari eta dantzazaleak dantzan jartzeko.

Bart, Euskadi Irratiko Andromeda saioan, Haizea Ormaetxea aurreskulari leioarra elkarrizketatu zuten. Arabako aurresku txapelketa irabazi duela eta, orain arte gizonezkoak nagusi izan diren eremuan emakume bat sartzeko egin behar izan dituen lanak eta aurkitu dituen oztopoak izan zituzten mintzagai. Hemen entzun dezakezue elkarrizketa osorik.

Dantza tradizionalak ikasi, landu eta konpartitzeko jaialdiak ugari izaten dira uda partean.Uda honetan Frantzia, Portugal, Belgika eta Espainian ospatuko diren zenbait dantza jaialdiren zerrenda prestatu du Patxi Monterok, eta tartean Euskal Herrian ospatzen den jaialdi txiki bat: Dantz´Hadi, Ahetzen.

Trikitxa eta euskal kulturaren alorrean lan handia egindako da Jose Jabier Abasolo "Tiliño" iurretarra, eta omenaldia egingo diote Euskal Herriko Trikitixa Egunean. Dantzaren alorrean ere oso ezaguna dugu Tiliño, Iurretako dantzari-dantza zuzpertzeko eta sendotzeko lan egin baitu, eta Euskal Dantzarien Biltzarrean aritu baita urte askoan.

Datorren ekainaren 30ean hasi eta uztailaren 3an amaituko da lehen "Gran ball de Catalunya" jaialdia Kataluniako Sant Ferriol eta Besalu herrietan. Dantza programazio zabala antolatu du Les Quatre Soques elkarteak egun horietarako. Ikuskizunak, tailerrak, erromeriak... ez da dantzaz gozatzeko aukerarik faltako.