Dokumentuaren akzioak
Albisteak
Espainiako dantzaren plan orokorra onartu dute
Azaroa hasieran bildu zen Tenerifen Espainiako dantzaren II. foroa. Autonomi erkidegoetako ordezkariak, dantzaren munduko profesionalak, dantza elkarteak, kudeatzaileak eta Arte eszenikoetako Espainiako institutoko kideak bildu ziren. Bertan aurkeztu eta onartu zuten, besteak beste, dantza alorraren bultzada izan nahi duen 2010-2014. urtearteko Espainiako dantzaren plan orokorra.
Eguberrietako dantza jardunaldiak Getxon
Getxo dantza elkarteak aurten ere, eta laugarrenez, gabon parterako dantza jardunaldiak antolatu ditu. Abenduaren 26 eta 30 artean izanen dira ikastaroak eta jazz dantzan, flamenkoan, dantza klasikoan eta dantza garaikidean sakontzeko aukera izanen dute izena ematen dutenek.
Sorkuntza eta tradizioa aztergai Ortzadarren jardunaldietan
Sorkuntza eta tradizioaren arteko harremana aztergai izanen da Iruñeko Ortzadar Euskal Folklore Taldeak antolatutako bere XXV. jardunaldietan. Ostegunean eta ostiralean izanen dira hitzaldiak Erraldoien txokoa delakoak. Ohiko hitzaldiez gain dantza sorkuntzarako laborategia ere antolatu dute aurtengoan.
Arte Eszenikoen Goi Mailako Eskola eztabaidan, Bilbon
Bilboko Auzo Elkarteen Federazioak, Arte Eszenikoen Goi Mailako Eskolaren gaineko jardunaldia antolatu du aste honetan. Bi mahai inguruk osatuko dute eztabaida eta unibertsitate mailako arte eskola honen papera aztertuko dute horietan zenbait profesionalek eta adituk.
Baztango mutil-dantzak Estatu Batuetan Larraldetarren eskutik
AEBtako euskal amerikarren elkarteak, NABOk, mutil-dantzen ikastaroa antolatu du Bakersfield-en eta San Franciscon, azaroaren erdialdera. Arizkungo Javier eta Patxi Larralde aita-semeak izanen dira dantza-maisu eta txistulari lanetan. Javier Larraldek urte batzuk egin zituen bere garaian AEBtan artzain, eta semearekin berriz hara bidaiatuko du orain dantza ikastaro hauek ematera.
Juan San Martin-en argazkiak GureGipuzkoan
Gipuzkoako Foru Aldundiak argazki fondo zabala ari da sareratzen GureGipuzkoa webgunean. Oraingoan Juan San Martin euskaltzain, ararteko eta ikertzaile nekaezin izan zenaren argazki fondoa (6.000 irudi) sareratu du eta tartean badira hainbat dantza argazki interesgarri.
Juan Mari Beltranen "Ttakun ttan ttakun": musika, dantza eta antzerkia
Disziplina anitzeko proiektua abiatu du Juan Mari Beltran musikariak, Txalapartaren inguruan. Musika, dantza, antzerkia, narrazioa eta ikus-entzunezkoak nahastuz Txalaparteren ibilbideari buruzko ikuskizuna antolatu du. Aurre estreinaldiekin ari dira orain. Hurrengoa, heldu den ostegunean (azaroak 12) Iruñeko Gayarren antzokian.
Eliralek umeentzako ikuskizun berria estreinatuko du: Otto
Elirale konpainiak umeendako ikuskizun berria estreinatuko du azaroaren 12an (osteguna), Azkaingo Jauregian: Otto. Euskerazko emanaldia da eta konpainiako kideek diotenez, "Otto, bidaia bat umeen egunerokotasunean barna. Ametsaldi bat, haurtzaroaren mundu sentiberan murgiltze bat…"
Itsasoarekin dantzan
Itsasoa haserre dabil egunotan Kantauri aldean. Donostiako Paseo Berrian oldartzeko joera erakutsi ohi du eta olatuen-dantza ikusgarria izan ohi da. Hori gogoan hartuta Gorka Bravo argazkilariak Laura Gil dantzaria gonbidatu du Itsasoarekin dantza egitera.
Aiko taldearen azken diskoa, jaisteko moduan
Aiko taldeak Maritzuli konpainiaren Aurrez-aurre ikuskizunerako grabatutako CDa osorik jarri du bere webgunean, bertatik jaisteko moduan. Aurreko diskoak ere aurki daitezke bertan eta horiek ere deskargatu daitezke.
Dokumentuaren akzioak
