Edukira salto egin | Salto egin nabigazioara

Tresna pertsonalak
Hemen zaude: Hasiera Komunitatea Kezka dantza taldea Momotxorroak, kaldereroak eta hartzak

Dokumentuaren akzioak

Momotxorroak, kaldereroak eta hartzak

Berandu baina seguru dator Eibarko aratosteetako kronika. Hiru aste pasa dira dagoeneko inauterietatik, baina dagoeneko iazko kontuak direla iruditzen zaigu.

Iragarri bezala otsailaren 24an Galdakaoko Andra Mari dantzari taldea izan genuen Eibarren, aratusteetako barixakuan ohikoa den kaldereroen kalejirarekin bat eginez. Orain 30 urte Galdakaoko taldeak berreskuratu zuen Altsasuko inauteria ekarri zuten Eibarrera. Ikusmina eta harridura eragin zituen Eibarko ikusleengan Andra Marikoek prestatutako inauteri ikusgarriak.

Kaldereroek ohiko ibilbidea egin zuten. Urkizuko parkean elkartu ziren kalderero guztiak. Kezkako dantzari eta dantza eskolako ikasleez gain, bestelako dantza ikastaroetako ikasleak, Musika Eskolako zenbait ikasle eta Lagun artea eta Txolarte elkarteetako kideak bildu ziren. Koordinazio lanetan aritzen diren etakittoko lagunekin batera Pantxika astoa eta gurdia, Ustekabe txaranga eta Jainagaren tritiki eskola batu zitzaizkien kaldereroi. Guztira 200 inguruk osatu zuten kaldereroen konpartsa.

Kaldereroen konpartsa Urkizutik abiatu eta Bittor Sarasketako aldapari heldu zioten Estazio kalera bidean. Estazioan zain zuten Hartza eta han hasi ziren lehen oihuak eta antxitxiketa saioak.

Baina kaldereroen hartzaren ondoan Altsasuko inauteria osatzen zuen konpartsa osoa zegoen zain Estazioan. Ordurako momotxorroek eginak zituzten beroketa saio batzuk eta Ibarrekurutze aldera pilatu ohi diren ikusleek antzemana zioten lasai-lasai begiratzeko aukera handirik ez zela egongo.

Momotxorroen atzetik Altsasuko inauteria osatzen duten eszena guztiak zetozen, momotxorroek eragindako izutik errekuperatu orduko pertsonaia eta inauteri-mozorro sorta benetan bitxi eta ikusgarriaz gozatzeko aukera izan zuten eibartarrek.

Toribio Etxebarria kalean, jendea alde guztietan zegoela, korrikaldiak, hartzen jolasak eta dantzak, ziripoten erorialdiak, emankortasuna eta bizitzaren komitiba, musika, dantzak eta kaldereroen kantak nahasi ziren eta inauteri une ederrak bizi izan genituen.

Halako batean iritsi ginen Untzaga plazara, eta Asier Cuevas korrikalari prestuak irakurritako pregoiaren ondoren, azken dantza eta kantuekin bukatu genuen emanaldia.

Galdakaoko Andra Mari dantzari taldeari eskerrak ematea baino ez zaigu geratzen, Eibarrera ekarritako inauteri eder eta indartsuarengatik, eta oro har folklorearen alorrean egiten duten lan bikainarengatik.

Argazkiak: Felipe Loyola

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Kezka dantza taldea

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

 Valladolideko Gure Txoko euskal etxeak gonbidatuta Arrateko ezpata-dantza eta trokeo dantzak aurkeztu genituen 2015eko irailaren 26-27ko asteburuan Gaztela Leongo hiriburuan. Euskal Jaia ospatzen zela eta, bertako euskaldunen gonbidapena jaso ostean, 27 pertsonako taldea osatu genuen Kezkako dantza...

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

Koko-dantzak 2014: taldeko argazkia

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

 2015eko maiatzaren 30ean eta 31n ospatu zen Ezpalak jaialdia Eibarren eta Iruñean.  Nafarroako jaialdiaren kronika  orain bi hilabete argitaratuta, Eibarkoa genuen zorretan eta hemen gatoz berarekin. Soka-dantzak izan ditugu ardatz Ezpalak jaialdiaren 10. ekitaldian (Eibarren, 9. Iruñean), eskuz ...

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

Argazkia: Fernando Retolaza

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.



Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com