Txorittua norat hua koko-jantzita? 2016ko koko-dantzen kronika

Elurrak ez, baina, euri zipriztinek busti giztuzten akaso 2016ko Koko-dantzetako egunean, urtarrilaren 30ean. Ziklo olinpikoak jarraitzen ditugu koko-marruok ere,  lau urtetan ematen diogu itzulia Eibarko baserri-auzoei, eta aurtengoarekin hirugarren zikloari hasiera eman diogu Gorosta eta Arrate auzoetan. 47 kide joan gara eskean 37 baserritara; dantzan eta kantuan.

Urtero lez, goizean goizetik bildu ginen arropak jantzi, margotu, aurpegiak estali eta 8:30etarako Merkatu plazan lehen agerraldia egiteko. Don Eusebioren txapliguak eman zien hasiera Koko-dantzei, beste behin ere. Fox- trot, makila-dantza eta arin-arina, hoietxek dira, koko-marruen soka-dantzarekin batera, eguneko dantza errepertorioa osatzen dutenak eta azken hori ez ezik gainontzeko guztiak plazaratu genituen plazan bertan.

Dantzak amaitua, denok bildu eta egun osoan zehar eskerako erabiltzen ditugun koplak kantatu genizkien plazan bildutako baserritarrei, Honela diote:

Koko-moko saria be moko
gibel-gibel afaritarako
dirua baneuka patrikarako.

Hala-hala hauxe karnabala
goazen-goazen gosetu ein garala
hau etxiau luze gorde daixala.

Baserri dexente zirela eta, beste urte batzuetan egin izan dugun moduan, taldea bitan banatuta ekin genion ibilbideari. Hona aurtengo talde handiaren argazkia:

Talde batek oinez egin zuen bidea, Gaztelu, Arizmendiguena, Arizmendi, San Juangua, Zelaikoa, Unzueta, Agiñao Azpi, Agiñao Gain, Guenexe, Narru erdikoa, Aretxitagoikoa, Barrundi, Iñarra, Mendigoiti, Lezeta, Asola Berri, Sumendixa Goikoa eta Sumedixa Behekoa baserrietan aritu ziren eskean.

Dantzari eta kokomarruekin batera Eneritz Aranburu, Unai Txurruka eta Andoni Urbieta aritu ziren musikari lanetan.

Furgoneten karabanak, aldiz, Mugitza, Pagolatxabola, Gorostabeletxe, Gorostagainekoa, Gorostabeña, Gorostazpikoa, Zestero,  Kantabria, Mugitzabarri, Itsaso, Maapilla, Zezeil, Ezkaregu-Errota, Biriñao, Lezetaabeletxe, Altzubarren eta Lazareto baserriei egin zien bisita.

Hauekin musikari Adolfo Jainaga, Unai Narbaiza eta Jose Miguel Laskurain joan ziren.

Pagola-txabola baserrian, lutua errespetatu eta Txorittua norat hua abestiarekin gogora ekarri genuen etxean denbora gutxi zela galdutako senidea. Lau urte barru berriro han izango gaituzte, ordurako gordeko ditugun musika eta dantzekin.

Zer esan urtero harrera ezin hobea egiten diguten baserritarren inguruan? Txorizo eta salda, txokolate bero eta bizkotxo, San Blas opil eta intxaur, sagar eta kiwi, porru eta aza... ondo baino hobeto zaintzen gaituzte Eibarko baserri bailaretan. Hemendik 4 urtera berriro han izango gaituzue Arrate eta Gorosta! Eskerrik asko!

Baserrietako lanak eginda, bazkaldu eta arratsaldeko kalejirarako prestatu ginen. 19:00etan Elgoibarko Mauxitxa txarangarekin batu eta Toribio Etxeberria, Untzaga eta Kalbeton kaleetan aurrera eta atzera, dantzan, kantuan eta festan jarri genuen herria.

Ermuko Txindurri dantza taldeko dantzariak ere gehitu zaizkigu aurtengoan lehenengoz, koko-dantzatako pertsonaia berri izendatuko ditugu agian... Kokotxindurriak!! Espero dugu datozen urteetan ere gure artean izatea.

Kokomarruen soka-dantza birritan egin genuen kaleotan, lehen aldiz Deportibo parean eta Kosko taberna aurrean ondoren. Zenbait barre algara ere eragin zituzten Don Eusebiok eta Mariak, Hartzak eta Petrak, Batista kojuak eta Arrateko Amabirjiniak, Kattalinek eta Martin perratzailiak eta Manuelak eta Koko buruzagixak osatutako bikoteen xirri eta saltoek. San Andres elizako atariak ikusi zituen, oraingoan ere, Koko-dantzen azkeneko dantza eta irriak. Hurrengo urtera arte!

Hona Iñaki Zugasti, Fernando Retolaza eta Ane Sarasketaren irudi sorta zabalago bat: