Jose Zugasti: zure Formen Dantza da gure Dantzen Forma

2024/12/19 10:45

Jose Zugasti: zure Formen Dantza da gure Dantzen Forma

Arku-dantza Jose Zugastiren Formen dantza eskulturaren inaugurazioan, Eibar, 2010-11-29. Argazkia: Iñaki Zugasti - Kezka dantza taldea / cc-by-sa

Egunotan zendu da Jose Zugasti Arizmendiarreta (1952-2024) eskultore eibartarra. Formarekiko interesa partekatzeaz gain, Kezkako Iñakiren anaia, Arantzaren koinatua eta Hiart eta Ekhiren osaba zen Jose Zugasti. Erasanda gaituzte Kezkaren muinean den familian hiru hilabetetan izan diren hiru heriotzek.

Kokuen itxuraldatzea Kakalardokuan

2010eko azaroaren 29an, San Andres bezperaz, Jose Zugastiren Formen Dantza eskultura inauguratu zen Ego-gainen. Toki horretan garai batean Ego erreka zeharkatuz zegoen Kakalardokuaren zubia eta zubi hori gurutzatzen zuten kokuen itxuraldaketa eta metamorfosia izan zuen gogoan Zugastik eskultura planteatzerakoan.

Formen dantza 2010 Arku-dantza — Arku-dantza Formen Dantza eskulturaren inaugurazioan, Eibar, 2010-11-29. Argazkia: Iñaki Zugasti - Kezka dantza taldea / cc-by-sa

Formen Dantza kokatutako toki horretan Alfa lantegiaren fundizioa izan zen. Hamar urte lehenago hor bertan elkartu ginen dantzariak eta Eibarko Klub Deportiboko argazkilariak, Eibarko industriaren aro oparoenaren sinbolo zen fabrikan, desagertu aurretik, azken koladen argira dantza eta argazkiak egiteko. Alfatik sortutako beste atal batean, horti metro gutxira dagoen Alfa Arten egin ziren Zugastiren Formen Dantzaren arkuak.

Kezka Alfa 2000 82 — Kezka dantza taldeko dantzariak Alfan, fundizioan, 2000. urtean. Argazkia: Felipe Loiola - Eibarko Klub Deportiboa / cc-by-sa

Arkuak dantzan

Zugastik arkuak dantzan jarri nahi izan zituen, Oñatiko arku-dantzan bezala, gorputzak eta arkuak elkarren artean nahasten direnean sortzen duten nahas-masa, dantzariek salamala deitzen duten horretan inspiratuta irudikatu zituen eskultura osatuko zuten arkuak, dantzan.

Eskultura gorputzen artean ikustea gustatzen zitzaion Jose Zugastiri. Erakusketa gelan baino hobe kalean eta herritarrengandik aparte baino hobe herritarren artean. Poza hartzen zuen jendea arkuen artetik pasatzen ikustean. Edo eskultura, altzari urbanoa bailitzan tertuliarako lekutzat eta umeen olgetarako jolastokitzat hartuta ikusten zuenean.

Formen dantzak lotuta

Inaugurazioko ekitaldiari begira ere eskulturarekin dantza egitea iradoki zigun Jose Zugastik. Halaxe egin genuen, jatorriz Eibarkoa den Ibarzabal arku-dantzarekin, arku eta gorputz, eskultura eta dantza, Zugastiren formen dantza eta Kezkaren dantzen forma uztartu genituen Usartzako txistularien doinura, betiko lotuta geratu zen korapiloan. Eskerrik asko Jose.

Jose Zugasti eta Kezkako dantzariak 2010 — Jose Zugasti, Kezkako dantzariak eta Formen Dantza eskultura, Eibar, 2010-11-29. Argazkia: Iñaki Zugasti - Kezka dantza taldea / cc-by-sa

Dokumentuaren akzioak

Bidali hitzordua

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Sartu

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.

Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com

Tresna pertsonalak