Astebetez Lapurdin dantzan
Ezpeletan kanpamendu-basea jarrita, Gauargi nazioarteko foklore jaialdiaren baitan, astebete Lapurdin dantzan eta festan aritu da Kezka dantza taldeko gaztetxo talde bat uztailaren 17tik 23ra bitartean. Palestina, Argentina, Bolivia, Txetxenia eta Ukrainiako folklore taldeekin batera, eta beste euskal dantza talde batzuen parte-hartzeekin, Basusarri, Senpere, Donapaleu, Ainhoa, Larresoro, Zuraide, Donibane Lohizune eta Biarritzen izan dira jaialdian parte hartu duten dantzariak.
Kezka dantza taldeko ordezkaritza honakoek osatu dute. Dantzariak, hamairu guztira, honakoak izan dira: Enara Magunazelaia, Unai Igarza, Irati Azpilikueta, Ane Ajuriagerra, Ane Irusta, Eider Lasa, Maddalen Arriola, Olatz Araolaza, Julene Andres, Amaia Basterrika, June Mallagaray, Maialen Saez eta Naia Eguren. Musikariak: Marina Ereña, Miren Hazas eta Ekhi Zugasti aritu dira Kezkatik eta Dugunako Iñaki Sagardoi, Julen Fagoaga, Aritz Ibañez, Julen Leuza eta Aitor Huarte Iruñea aldetik. Dantzariekin irakasle eta begirale lanetan Maite Gonzalez, Miren Hazas eta Leire Andikoetxea aritu dira.
Bi errepertorio eskaini dute Lapurdin aritu diren dantzariek. Batetik, Arrateko trokeo-dantzetako eta Gipuzkoako brokel-dantzako zenbait piezak osatutako emanaldia egin dute. Zehazki Arrateko makila txikiekikoa eta brokel-makilena, eta Gipuzkoako zinta-dantza eta uztai handien dantza eskaini dituzte. Bestetik, Andoaingo eta Adunako axeri-dantza. Horien gain, fandango, arin-arin eta kalejirak ere bai, emanaldien iraupenaren arabera.
Hainbat goizetan kalejira eta jaialdiari lotutako animazio jarduerak, eta arratsaldetan emanaldiak eskaini badituzte ere, festa eta bestelako jardueretarako tartetxoak ere izan dituzte, hala nola Ezpeletako kirol-gunean, Senpereko lakuan edo Biarritzeko hondartzan.
Argazkiak Miren Hazas, Maite Gonzalez, Leire Andikoetxea eta Iñaki Zugastik eginak dira, beste zenbaiten artean.
- Kezka dantza taldea Gauargi 2019 jaialdian [argazkiak]