Lantzeko zortzikoa Le Grand Bal d'Europen

Lantzeko zortzikoa dantzatzen ari da jendetza Frantziako Gennetines herrian jasotako irudi hauetan. Munduko dantzaldien ama edo Le Grand Bal d´Europe dantza jaialdia ospatzen dute urtero Gennetines herritxoan. Dantzatzea gustatzen zaionarentzat paradisua izan daiteke dantza jaialdi hori. Musika eta dantza hogeita lau orduz bi astean zehar. Zelai batean karpa batzuk muntatu eta gau eta egun dantzaz eta musikaz gozatzeko aukera izaten da, Europa osoko dantzari eta musikarien topaleku bihurtzen da. Aurten uztailaren 19tik abuztuaren 2ra izan da jaialdia eta bertaratu den dantzazale batek honako irudiak sareratu ditu. Atzeko oholtzatik Lantzeko inauterietan dantzatzen den zortzikoaren doinua entzun daiteke. Eszenatoki osoa musikariz beteta dago eta zortzikoaren doinuari dantzan jarraitzen ari dira ehundik gora dantzazale. Irudiak: Jean-Cyrille Lorthios. Lantzeko zortzikoa Gennetinesen, Le Grand Bal d´Europe, 2019.