Biarritzeko San Martin ezpata-dantzan izan gara Kezkako dantzariak

Azaroaren 11n, San Martin egunez, Biarritzeko ezpata-dantzan parte hartzeko aukera eskaini digu Maritzuli konpainiak, bai ezpata txikiak dantzatzen dituzten bakalari bezala, bai ezpata luzeekin taldean eta baita dantzari txiki arku-dantzari taldean ere.

Guztira Kezkako 21 dantzarik parte hartu dute, 6 dantzari helduk eta dantza eskolako 16 dantzari gaztetxok. Bertan, Biarritz bertakoez gain Baiona, Donibane Lohizune, Hendaia, Bidart, Angelu eta Leioako dantzariekin batera San Martin ezpata-dantza Biarritzeko kale eta plaza ederretan eskaintzeko aukera izan dugu.

Asteburua Biarritzen

Iazko Eibarko Dantzari Egunean Biarritzeko arku-dantza eskaini zuen dantzari gaztetxoen talde batek, eta bide horri jarraitu zaio ikasturte berrian, Biarritzeko kaleetan dantzatzeraino. Aurreko asteetan Biarritzeko Maritzuli konpainiako dantza-maisuak, Claude Iruretagoiena, Jon Olazkuaga eta Jon Iruretagoiena Eibarren izan dira hainbat aldiz prestaketa lanetan eta entseguetan. Larunbatean iritsi zen dantzari eibartarren espedizioa Biarritzera, eta entsegu eta erropak probaketak egin ziren larunbat arratsaldean. Bertan lo egin eta igandean goizean goiz ekin zitzaion Gare du Midin, Malandain Ballet Biarritzen egoitzan, janzte eta prestaketei.

Ondoren, Biarritzko hainbat plaza, kale eta ingurune ederretan eskaini zuten Biarritzeko San Martin ezpata-dantza eta arku-dantza iparraldeko eta hegoaldeko dantzariek. Kofradiako kutxa, bandera, ezpata-luzez osatutako 24 ezpata-dantzarien taldea gidariak zuzenduta, zortzi azkendari ezpata txikiekin, hamasei arku-dantzari beren kapitainarekin eta Martin hartza bera, Kutx txistulariaren esanetara jardundako txistulari taldearekin osatutako segizioak San Martin ezpata-dantzaren segizio ikusgarriarekin harritu zituen Biarritzeko kaleetan ziren herritarrak.

Kezkako dantzari gazteak eta helduak

Kezkako dantzari gazteen taldea honakoek osatu dute: Manex Cordoba, Alaitz Sanz, Lorea Sarasketa, Arrate Delgado, Ekain Araolaza, Ekhi Martinez, Eki Muruamendiaraz, Xabat Telleria, Noah Palacios, Paule Ibarrola, Enara Gabiola, Izaro Bernedo, Male Ortueta, Udazken Salaberria, Manex Gisasola eta Ekhi Azpilikueta. Arku-dantzariak izan dra hamasei dantzari gazteak, Ekhi Martinez kapitain lanetan aritu delarik. Amaia Visus eta Leire Andikoetxea izan dira arku-dantzari gazteen irakasleak, Maritzuliko dantza-maisuen esanetara.

Dantzari helduak berriz honakoak izan dira: Leire Andikoetxea, Amaia Visus, Amaia Rodriguez, Ainhoa Larrañaga, Miren Hazas eta Oier Araolaza. Arku-dantzarien buruzagi aritu da Leire Andikoetxea, ezpata luzeen taldean aritu da Ainhoa Larrañga, eta ezpata txikiekin, azkendari lanetan aritu dira Amaia Visus, Amaia Rodriguez, Miren Hazas eta Oier Araolaza. 

San Martin ezpata-dantzaren kofradia

Maritzuliko Jon eta Claude Iruretagoiena Arrateko dantzarien kofradiako kide dira 2011. urtetik, eta 2018 honetan, Kezkako dantzariak pasa dira Biarritzeko San Martin ezpata-dantzarien kofradiako kide izatera. Biarriztarrak frontoian, bazkari goxoaren ondoren egindako kofradiaren ekitaldian, Biarritzeko ezpata baten eta arku baten oroigarria eskaini zitzaien Kezkako dantzariei, kofradiako kidetzari sarrera emanez. 

Mila esker Maritzuli konpainiari eta SAn Martin ezpata-dantzaren kofradiako kideei gonbidapen, festa-eder eta harreragatik, eta gora San Martin ezpata-dantza!

• Biarritz 2018ko San Martin ezpata-dantza. Iñaki Zugastin argazkiak.