Dokumentuaren akzioak
Albisteak
Dantza EHUren Artea eta Kultura ikastaroetan
Euskal Herriko Unibertsitateak antolatzen dituen Bilbao Arte eta Kultura uda ikastaroetan bi dantza ikastaro izango dira aurten. Batetik, Mal Pelo konpainiako Maria Muñoz-ek eskainiko duen dantza garaikide ikastaroa, eta bestetik, Soka proiektuaren inguruan Pantxika Telleriak emango duena.
Nafarroaren Eguna dantzaz beteta dator ohi bezala
Datorren apirilaren 25ean ospatuko da Baigorrin Nafarroaren Eguna. Dantza osagai garrantzitsua izaten da Nafarroaren Egunean, eta aurten ere hainbat dantza ekitaldi aurreikusi dira: Bera, Fustiñana, Zangotza eta Ibarrako dantza taldeak, dantza-jauziak goiz eta arratsaldez, larrain-dantza e.a.
Olatu talka dantzaz beteta dator
Datorren asteburuan, apirilaren 23tik 25era, Olatu Talka izeneko jaialdi berezia ospatuko da Donostian. Jaialdia osatzen duten osagaiak herritarrek proposatu eta bultzatu dituzte, horixe du jaialdiak ezaugarri bereziena. Hainbat dantza ekitaldi izango dira tartean.
Jauziak, Arabako dantzak eta gorputzaren prestaketa Dantzan Ikasiren eskaintza berrian
Ikastaro eskaintza berria prestatu du Dantzan Ikasik. Arabako Errioxako dantzak, gorputzaren prestaketan laguntzeko ikastaro bat eta dantza-jauziak sakon ezagutzeko aukera emango dien mintegi batean parte hartzeko aukera izango da maiatza eta uztaila bitartean.
Brnoko Antzoki Nazionaleko Balletak Raymonda aurkeztuko du Victoria Eugenian
Datorren asteartean, apirilak20 , Victoria Eugenia Antzokiak Brnoko Antzoki Nazionaleko Balleta eta Orkestraren Raymonda taularatuko du arratsaldeko 8etan, Classic zikloaren barne.
Berriofolk: Berriozarko Folklore Jaialdia
Datorren maiatzaren 8an, Txori Zuri dantza taldeak antolatuta, Berriofolk II. Folklore Jaialdian ospatuko da Berriozarren. Ibiza eta Gaskuñako taldeek parte hartuko dute jaialdian.
Dantzari Festaren 15. edizioa Hernanin
Hernaniko San Joan Konpartsak antolatuta, Dantzari Festaren 15. edizioa ospatuko da Hernanin apirilaren 17tik 24ra. Burrunka taldearen ikuskizunak borobilduko du astebeteko ekitaldi sorta.
Apple Ghost: e-koreografiak 2.0
Iker Gomez koreografo eta sortzailea Tenerifeko Danzalab konpainiarekin lanean ari da proiektu berri batekin esku artean. Apple Ghost izeneko ikuskizun honetan sortzen diren koreografiak Interneten bidez hedatuko dituzte eta ikusleek hurrengo kapitulua zein izan behar den eskatu ahal izango dute.
Lucia Lakarra, Vianako Printzea Kultura Sarirako hautagai
Nafarroako Gobernuko Kultura eta Turismo sailak baieztatu du Lucia Lakarra dagoela Vianako Printzea Kultura sarirako 24 hautagaien artean. Mario Vargas Llosa, Placido Domingo, Jose Carreras, Richard Serra edo Krystian Zimerman daude hautagai zerrendan.
Indarra dantza taldeak Poloniako Euskal Jaian dantzatuko du
Poznan hirian, apirilaren 21etik 23 ospatuko den Dni Baskijskie edo Euskal Jaian parte hartuko du Gasteizko Indarra dantza taldeak. Bertako Adam Mickiewicz unibertsitatean euskara irakasten da eta urtero antolatzen dute Euskal Jaia bertan.
Dokumentuaren akzioak
