Sokak lotzen duena

Kuarrenta

2023/12/11 07:55

Maria Arantzazu Marin Balda eta Ramon Albistur Esparzaren ezkontza, 1942. Argazkia: Kutxateka - Vicente Martin

Ezkontza batean bi norbanako eta haien familiak batzeko, nekez irudikatu liteke erritual adierazgarriagorik soka-dantza baino. Gaur egun ezkontzetan indibidualen aurreskua, sokarik gabe eta protagonistak hartzaile pasibo jarrita ezinbesteko argazki bihurtu bada ere, luzaroan sokako aurresku edo soka-dantzaren bidez ospatu eta irudikatu du bi familien elkartzea.

Maria Arantzazu Marin Balda eta Ramon Albistur Esparzaren ezkontza ospatzeko plazaratutako soka-dantzaren irudiak ikusi ditugu Kutxatekan, Vicente Martin argazkilariak egindakoak, 1942an. Azalpenen arabera, Elgorriagako (N) San Pedro elizan ezkondu ziren. Ezkonberriak, gero Donostiako alkate izango zen Xabier Albisturren gurasoak.

1942 Doneztebe ezteiak — Maria Arantzazu Marin Balda eta Ramon Albistur Esparzaren ezkontza, 1942. Argazkia: Kutxateka - Vicente Martin

Doneztebeko (N) jatetxe batean bazkaldu zuten eta bertako frontoian egin zuten ondorengo jaia. Argazkietan ikus daiteke senar-emazteak eta gonbidatuak sokan dantzatu zirela. Ez dakigu nongoak ziren bi familiak, baina Donezteben eginda bazkaria, ez ziren oso urrutikoak izango. Horrela, irudi hauetan Doneztebeko trapatan dantzarekin parekotasunak aurki daitezke: soka-dantza, aurresku edo aitzineskuaren protagonismoa, zapien erabilera, fandangoa eta porrusalda.

Aurreskuak dantzatzen dio Maria Arantzazu Marin Balda ezkonberriari, baina baita senarrak berak ere. Ezkonberriak elkarrekin sueltoan dantzan ere ikus daitezke. Bukaeran fandango eta porrusaldan sokaren egitura mantentzen dute bikoteka dantzatuz, baina sokaren formazioa galdu gabe.