Ezkonberriak dantzan

Kuarrenta

2019/02/20 09:00

Karmen Urretaren eta Modesto Etxeberriaren ezkontza, 1948. Argazkia: Kutxateka - Vicente Martin

Lasarten, 1948. urtean, Karmen Urretaren eta Modesto Etxeberriaren ezkontzan Vicente Martin argazkilariak ateratako argazkiak argitaratu ditu Kutxatekak. Karmen Urreta Aita Donostiaren iloba zen. Irudietan ikus dezakegunez, Lasarteko Villa Mirentxun ospatu zen ezkontzako bazkarian ez zen dantzarik falta izan.

Ezkontzan dantzan 1948 — Karmen Urretaren eta Modesto Etxeberriaren ezkontza, 1948. Argazkia: Kutxateka - Vicente Martin

159 argazkiko bilduman, 1948an Urretak eta Etxeberriak ospatu zuten ezkontzako argazkiak ageri dira, tartean, hainbat dantza-irudi. Ezkonberriak elizatik ateratzean dantzariek arkua egin zieten ezpatekin, bazkal ondoren, berriz, aurreskua eta ezpata-dantza eskaini zizkieten. Badirudi, senar-emazteak, Schola Cantorum taldeko kideak zirela eta taldekideak direla irudietan ageri diren dantzariak.

1948 ezkontza — Karmen Urretaren eta Modesto Etxeberriaren ezkontza, 1948. Argazkia: Kutxateka - Vicente Martin

Dantzariek ezpata-dantza dantzatzeaz gain, aurreskua sokan ere dantzatu zuten. Senarrak emazteari dantzatzen dio agurra, emaztea zerbitzarien tartean dela.

Irudi batean, ezkonberriak bakarrik dantzan ageri dira, litekeena da beraien lehen ezkon-dantza fandango edo arin-arin bat izatea. Gonbidatuekin eta dantzariekin ere ageri zaizkigu dantzan.