Hemen zaude: Hasiera Komunitatea Kezka dantza taldea Kezkako dantzariak Telmo Esnal-en "Dantza" filmearen errodajean

Dokumentuaren akzioak

Kezkako dantzariak Telmo Esnal-en "Dantza" filmearen errodajean

2017/07/04 10:55

Telmo Esnal zine zuzendari eta dantzaria Dantza izeneko pelikula grabatzen ari da, eta bertan parte hartzen ari gara Kezkako dantzariak. Telmo Esnal zuzendari lanetan ari da, eta bi sortzaile ditu laguntzaile, Koldobika Jauregi eta Juan Antonio Urbeltz. 

Koldobika Jauregi artista plastikoa arduratzen ari da jantzi eta atrezzoen diseinu eta estetikaz. Bestalde, Juan Antonio Urbeltzek euskal dantzarekin landutako mundu sinbolikoa eta Argiarekin plazaratutako eredu koreografikoan inspiratzen da dantza proposamena. Javi Agirre da filmeko argazki zuzendaria.

Euskal dantzariak

Euskal dantzariak, euskal dantza tradizionalean diharduten dantzariak dira nagusiki filman parte hartzen ari direnak, eszena batzuetan dantza garaikideko dantzariak ari badira ere.

Leitza: Dantza filmaren grabaketa 2017 talde-argazkia
Dantza filmaren grabaketa Leitzan, parte hartzaileen argazkia, 2017-05-14.

Argia dantzari taldeko dantzariak eta Argiaren inguruan lanean diharduten taldeetako dantzariak dira filmaren protagonistak: Arkaitz, Duguna, Haritz, Gure-Kai, Kezka, Urki, Astigar, Maritzuli edo Elai Alai taldeetakoak besteak beste, eta azken egunetako errodajeetan, beste hainbat herri eta taldetako dantzariek parte hartu dute.

Ezkio-Itsaso, Arantzazu, Belchite, Leitza...

Orain hiru urte hasi zen Telmo Esnal filmaren eszena baten grabaketarekin, hain zuzen ere Ezkio-Itsasoko Igartubeiti baserri-dolarean egin zen grabaketa hura. Filmea egiteko finantziazioa lotu ondoren, 2017an hasi dira grabaketak egiten, eta Kezkako dantzariak Arantzazu, Belchiten (Aragoa) eta Leitzan izan dira errodajeeetan parte hartzen.

Datozen hilabeteetan jarraituko dute grabaketek, eta 2018rako filma prest egotea espero da.

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Kezkako dantzariak Telmo Esnal-en "Dantza" filmearen errodajean

Dantza filmaren grabaketa. Argazkia: Txintxua.

Kezka dantza taldea

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.



Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com