Danok bat
Oñatiar askorentzat Korpus festak bereziak dira. Tradizio erlijiosoa oinarrian duen festa horrek nortasuna ematen baitio herriari. Izan ere, Korpus festa horiek, modu erlijioso zein folklorikoan bizi ditugunontzat, egun gogoangarriak izaten dira.
Festa nagusia igandean ospatzen den arren, dantzarientzat zita berezia den hori, hiru egunez luzatzen da. Ostiralean, baserri-auzoak eta herriko ikastetxeak bisitatuaz hasten dute asteburuko dantza jarduna. Larunbatean, aldiz, egun guztian zehar herriko kaleetan eta auzoetan kriskitinen eta txistu hotsa noiznahi eta non-nahi entzuten da. Igandean, aldiz, egun nagusia ospatzen da.
Oñatz dantza taldearentzat eta Korpus-dantzarientzat urteko emanaldi garrantzitsuenetakoa izaten da. Batez ere, tokiko dantzak herrian bertan dantzatzeak sortzen duen emozio eta harrotasun sentimenduarengatik.
Aurten, baina, emozioak ezberdinak izan dira eta zer esanik ez harrotasuna. Aurten, lehenbiziko aldiz, Oñatiko Korpus dantzetan gizon eta emakumeek berdintasunean dantzatu dute; asteburu betea eta osoa izan da.
Oraindik guztiz kudeatu gabeko emozioen dantzan gabiltzan arren, emandako urratsa gure OÑATZ izango denaren ilusioz gaude.
Egia da, Oñatiko Korpus dantzetan eta Oñatz dantza taldean zimendu berri bat ezarri dela. Ez bakarrik emakumearen parte-hartzea gauzatu delako; duintasun osoz garai berrietara egokitzen jakin izan duelako baizik.
Beraz, badugu nahikoa motibo 2018a gogoan izateko, honi esker, gure herriaren historiari lerro bat, eta garrantzitsua!, gehitu baitiogu.
DANOK BAT!
AUPA OÑATZ!