Hemen zaude: Hasiera Komunitatea Elai Alai Kultur Elkartea Karmele Goñi gogoan

Dokumentuaren akzioak

Karmele Goñi gogoan

2017/06/08 14:40

Elai Alaitik doluminak adierazi nahi dizkiogu Karmele Goñiren senitarteko eta lagunei, Euskal kulturgintzak hutsune nabarmena izango du atzotik aurrera.

Karmele 1926an jaio zen, Tolosan, eta Jose Migel Barandiaranen dizipulu kutunetako bat izan zen. Aranzadi Elkarteko Etnografia Saileko Idazkaritzaren arduraduna izan zen, Euzko Folklore urtekariaren idazlea, eta Euskal Herriko Atlas Etnografikoa egin zuen Etniker Gipuzkoa taldeko kidea 1964tik. Bilboko aurreneko ikastola (Resurrección Mª de Azkue) sortu zuen taldeko kidea izan zen, eta, 1997an erretiroa hartu zuen arte, Euskal Herriko Arkeologia, Etnografia eta Historia Museoaren (Bilbo) zuzendaria ere bai. Esan beharra dago maila gorenera eraman zuela museoa.

Euskal jantzietan aditua izanik, hitzaldi ugari eskaini zituen gai horren inguruan, bai eta liburu garrantzitsuak idatzi ere. Aholku paregabeak eman dizkigu Elai Alai taldeari, laguntza eske joan gatzaion guztietan; hala euskal dantza tradizionaletako jantziak egiteko, nola Kultura Tradizionaleko Nazioarteko Topaketetan parte hartzeko eskatu diogunean.

Sari garrantzitsuak jaso ditu bere ibilbidearen ohoretan, eta gure dantza-taldeak ere omenaldia eskaini zion 1997an, Nazioarteko Folklore Jaialdiaren barruan.

Goian Bego Karmele Goñi.

2017/06/09 10:11
Bat egiten dugu Aurtzaka dantza taldetik ere, Karmeleren izaera eta egindako lan eskerga goraipatzeko orduan. Zeraingo dantza eta tradizioen berri eman zigunean, oso gogoan dauzkagu bere amonaren baserri eder horretan egindako harrera abegitsua, eta elkarrizketaren goxoa. Zerbait magikoa sentitu arazi zigun, bai kontatutako edukietan, bai bere patxadan eta hitzen jarioan.
Oso gogoan zaitugu Karmele!

Erantzun

Erantzuna emateko identifikatu egin behar zara, gure webgunean erabiltzaile bat sortuz edo zure Twitter edo Facebook kontua erabiliz.

Karmele Goñi gogoan

Karmele Goñik XXIII. Nazioarteko Folklore Jaialdian jaso zuen omenaldia

Elai Alai Kultur Elkartea

Elai Alai Kultur Elkartea

Elai Alai dantza eta musika taldea Portugaleten sortu zen, 1962an, herri ekimenari esker eta herriaren tradizioari jarraiki.
Harrezkero, ELAI ALAI elkartearen nortasuna eta itzala sendotu egin dira, bai Euskal Herrian eta baita kanpoan ere, apalki  Euskal Herriaren folklore eta kultura tradizional joriaa etengabe berreskuratu, gorde eta zabaltzen jardunez.
Gaur egun Elai Alai Kultur Elkartearen ...baitan, Dantza eta Musika taldea, Portugaleteko Nazioarteko Folklore Jaialdia, Folklore Azoka, Jarrillero Abesbatza eta Dantza eta Musika tradizionaleko eskola sustatzen ditugu besteak beste.